Сулейман-Стальский район Республики Дагестан
www.old.suleiman-stalskiy.ru

Чирвилерин югъ – шад гьалара

Санлай Россиядин Федерациядин, Дагъустан Республикадин шегьерринни районрин школайра, вузра, колледжра хьиз, чи райондин школайрани Чирвилерин югъ шад гьалара къейдна. ЦIийи 2009-2010- кIелунин йис башламиш хьуниз талукьарнавай шадвилин линейкаяр райондин гзаф школайра хъсан тешкиллувал аваз кьиле фена. Идан шагьидар «Куьредин хабарар» газетдин корреспондентарни хьана. Абуру гьазурнавай куьруь репортаж чна агъадихъ гузва.

СтIал Сулейманан тIварунихъ галай Кьасумхуьруьн 1-нумрадин юкьван школа.  
Пакаман кьиляй школа галай патахъ гъилера цуькверин кIунчIар авай, чпел чIагай парталар алай аялар, абурун диде-бубаяр, муаллимар, мугьманар ахмиш жезва. Школадин гьаятда язавай музыкадин ванер кьуд патахъ чикIизва. Сувар тирди вирида гьиссзава, рикIелай зидвилерни, вахтунин татугайвилер  алатзава.
Сятдин 9 тамам хьана. Чирвилерин йикъаз ва цIийи кIелунин йис башламиш хьуниз талукьарнавай шадвилин линейка, тебрикдин гафар лугьуналди, школадин тешкилатчи Айишат Къурбаналиевна Кьасумовади ачухна. Педагогикадин зегьметдин ветеран Руиза Мегьамедовади ва 11-классдин ученица Сагьадат Кьасумовади, Россиядин Гимн ягъунихъ галаз санал, уьлкведин Пайдах хкажна.
Гаф школадин директор Х. Н. Хаироваз гана. Ада алатай кIелунин йисуз школадихъ кIелунин, экзаменар вахкунин ва спортдин рекьерай хьайи хъсан нетижайрикай гегьеншдиз суьгьбетна.- Школа цIийи кIелунин йисазни вири патарихъай хъсандиз гьазур хьанва, - къейдна директорди. – ИкI, райондин руководстводи пулунин такьатар ахъаюналди, школа капитальнидаказ ремонт авуна, адак пластикадин дакIарар кутуна, пищеблок эцигна. Къайгъударвиляй чна райондин руководстводиз, кьилди Имам Музамудиновичаз школадин коллективдин, аялрин диде-бубайрин патай чухсагъул лугьузва.
Х. Хаирова лагьайвал, алай кIелунин йисуз школада партайрихъ 750-дав агакьна аялар ацукьда, абурукай 48 аял школадиз сифте яз атанвайбур я.
Шадвилин линейкадал хуш келимаяр гваз райондин кьетIен гьаларин ва ГО-дин отделдин начальник М. Закеряев, школадин директордин заместитель Н. Агъаризаева, муаллим, зегьметдин ветеран Р. Лукьманова, шаир С. Саидгьасанов ва маса юлдашар рахана.
1-классдин ученикар тир И. Абасова ва Э. Гьажимурадова сифте зенг яна, аялри партайрихъ чкаяр кьуна.
 

Адрес статьи: http://old.suleiman-stalskiy.ru/?com=articles&page=article&id=1064