31-августдиз «Сулейман-Стальский район» муниципальный райондин депутатрин Собранидин нубатдин 15-сессия кьиле фена. Сессиядин кIвалахда райондин Собранидин депутатри, хуьрерин поселенийрин кьилери, администрациядин управленийрин, отделрин руководителри, гьакIни гьялзавай месэлайрихъ галаз алакъалу организацийрин руководителри иштиракна. Ам депутатрин Собранидин председателдин заместитель Н. Ш. Абдулмуталибова ачухна ва кьиле тухвана.
Сессиядал агъадихъ галай месэлайриз килигна:
1. Муниципальный райондин администрациядин яш тамам тахьанвайбурун кIвалахдин рекьяй ва административный комиссийри 2008-йисуз ва 2009-йисан 1-паюна авур кIвалахрин гьахъ-гьисабар.
2. 2009-йисан I-паюна муниципальный райондин бюджет тамамарнавай гьалдин гьакъиндай.
3. «Сулейман-Стальский район» муниципальный тешкилатдин бюджетдин гьакъиндай Положение тестикьарунин гьакъиндай.
4. «Сулейман-Стальский район» муниципальный райондин наградаяр гунин гьакъиндай.
5. Жуьреба-жуьре месэлаяр.
Сессиядал «2008-йисуз ва 2009-йисан 1-паюна «Сулейман-Стальский район» муниципальный райондин административный комиссияди авунвай кIвалахдин гьакъиндай» информация и комиссиядин председатель М. Гь. Агьмедова авуна. Ада къейд авурвал, муниципальный райондин административный комиссия райондин депутатрин Собранидин къарардалди 2007-йисан 29-январдиз тешкилна. Административный къайдайрин законодательстводин везифайрикай яз чавай инсандин интересар, азадвал, сагъламвал, агьалийрин санитарно-эпидемиологический таъминвал, чун элкъуьрна кьунвай тIебиат хуьн, государственный властди тайинарнавай къайда, общественный къайдаяр, физический ва юридический ксарин интересар хуьн ва административный къайдайрин гьакъиндай таъкимарун къалуриз жеда. Административный къайдаяр чIурай дуьшуьшра таъкимардай ва административный жерме ийидай ихтияр ава.
2008-йисуз административный комиссиядиз административный къайдаяр чIурунин гьакъиндай 36 протокол атана. Абуруз административный комиссиядин 4 заседанидал килигна, талукь серенжемар кьабулна. Лагьана кIанда хьи, и протоколрикай 28 райондин ветеринарный управленидай, 3 «УЖКХ» МУП-дай, 4 РОВД-дай атана. Талукь ксар ва организацияр жерме авуна ва я таъкимарна. Комиссияди кьабулай серенжемрин нетижада 2008-йисуз райондин чкадин бюджетдиз 21500 манат пул атана.
Гьайиф хьи, гзаф органрин работникри къайдаяр чIурунин гьакъиндай административный комиссиядиз материалар ракъурзавач. ИкI, мисал яз, 2008-йисуз ва 2009-йисан 1-паюна чилерин ва эменнидин алакъайрин управленидин пешекарри къайдаяр чIурунин гьакъиндай гьич са протоколни гьазурнач ва административный комиссиядиз ракъурнач.
М. Гь. Агьмедова давамар хъувурвал, 2009-йисан 1-паюна райондин административный комиссиядиз административный рекьерай къайдаяр чIурунин гьакъиндай 23 протокол атана. Комиссиядин 4 заседанидал абурукай 18-дай талукь серенжемар кьабулна, 5 материалдиз килигун давам жезва. И девирда РОВД-дин участковый инспекторрилай, чилерин ва эменнидин алакъайрин управленидин пешекаррилай килигун патал протоколар атанач.
Комиссиядин кIвалах райондин къенепата рехъ гузвай административный къайдаяр чIурунрилай къвезвай протоколрин ва заседанийрал кьабулзавай серенжемрин кьадардилай аслу я. Гьавиляй хуьрерин поселенийрин кьилери, талукь органрин руководителри административный къайдаяр чIурай дуьшуьшра чи комиссиядиз протоколар кхьиниз фикир гун лазим я.
Сессиядал «Яш тамам тахьанвай аялрин ва абурун ихтиярар хуьнин рекьерай комиссияди 2008-йисуз ва 2009-йисан 1-паюна тухванвай кIвалахдин гьакъиндай» и комиссиядин председатель С. М. Велиеван гьахъ-гьисабдихъ яб акална. Докладчиди къейд авурвал, вичин кIвалах яш тамам тахьанвайбурун ва абурун ихтиярар хуьнин комиссияди Россиядин Федерациядин ва Дагъустан Республикадин законрихъ («Об основах системы профилактики безнадзорности и правонарушений несовершеннолетних» ФЗ №120, «О профилактике безнадзорности и правонарушений несовершеннолетних в РД» №93, 3-ноябрь 2006 год) ва яш тамам тахьанвайбурун крарай комиссиядин Положенидихъ галаз кьадайвал тухузва. Комиссиядик 11 кас ква. Абурни талукь вири къуллугърин векилар я.
Вахт-вахтунда эвер гузвай комиссиядин заседанийрал РОВД-дин талукь къуллугъдин, РУО-дин образованидин управленидин инспектордин, жегьилрин крарин ва спортдин комитетдин, социальный хилерин учрежденийрин гьахъ-гьисабрихъ яб акалзава.
Гьахъ-гьисабдин девирда комиссияди 8 заседание тухвана, анрал 29 месэладиз, гьабурукай яз яш тамам тахьанвайбурун законлу интересар ва ихтиярар хуьнин 8 месэладиз килигна.
Алай вахтунда комиссиядин учетда тербияламишунин рекьяй лап четин тир яш тамам тахьанвай 30 аял ава.
Комиссия диде-бубавилин везифаяр тамамвилелди кьилиз акъудиз тахьунин гьакъиндай 8, гьабурукай яз диде-бубавиликай магьрум авунин 7 делодиз килигна.
Комиссиядин учетда диде-бубайрин къаюмвилик квачир 67 аялни ава.
Гзаф аялар авай, тIимил таъмин хзанрай тир 15 аял кIелун давамарун патал ДР-дин государстводин интернатриз ракъурнава.
Райондин социальный ва образовательный учрежденийра аялар ва жаванар патал 306 кружок тешкилнава, анра 4860-далай виниз аялар ава.
КIелзавайбурухъ галаз тербиядин рекьяй кIвалах тешкилунин карда комиссиядиз ДЮСШ-ри ва ДДТ-ди еке куьмек гузва. Пуд ДЮСШ-да ва аялрин яратмишунрин КIвале 2570-далай виниз аялар машгъул жезва. Абурукай чIехи пайни тIимил таъмин хзанрай тир аялар я.
Алай йисуз комиссияди са шумуд вацра школадиз атун тавур 6 аял тайинарна. Абурни АгъастIалрин къазмайрин ва ЦIийи Макьарин юкьван школайрай тир аялар я. Ахтармишунри къалурайвал, диде-бубаяр аялар тербияламишунал бес кьадар машгъул жезвач. Комиссияди диде-бубайрихъ галаз профилактикадин кIвалах тухвана, аялар школадиз ракъурунин патахъай талукь къарарар кьабулна.
Гьахъ-гьисабдин девирда комиссияди, гьа комиссиядин учетда авай аяларни галаз, 42 хзандин яшайишдинни дуланажагъдин шартIар ахтармишна.
С. М. Велиев гьахъ-гьисабдин докладда комиссияди рахун физвай девирда тухвай хейлин маса кIвалахрал, гьялиз тахьанвай месэлайрал, вилик акъвазнавай везифайрални гегьеншдиз акъвазна.
Сессиядал алай месэлайрай анал райондин Собранидин депутат М. М. Аскеров, административный комиссиядин жавабдар секретарь М. А. Ярагьмедов, райондин образованидин управленидин начальник Ж. А. Асланов, РОВД-дин старший инспектор В. Ф. Ибрагьимов, райондин администрациядин кьилин заместитель Гь. М. Гьажиагьмедов рахана.
Депутатри гьялай месэладин гьакъиндай къарар кьабулна.
Сессиядал «2009-йисан сад лагьай паюна муниципальный райондин бюджет тамамарнавай гьалдин гьакъиндай» райондин финансовый управленидин руководитель М. Т. Рагьимова информация авуна ва депутатри авур отчет тестикьарна.
Муниципальный райондин наградаяр гунин гьакъиндай гьазурнавай Положенидихъ галаз депутатар райондин Собранидин аппаратдин руководитель Р. А. Абдулазизова танишарна.
Сессиядал 2010-йисуз районда авай гзаф квартирайрикай ибарат тир яшайишдин кIвалер капитальный ремонт авунин гьакъиндай гьазурнавай муниципальный программадихъ галаз депутатар администрациядин эцигунрин управленидин начальник З. А. Гьажимирзоева танишарна ва анал тестикьарна.
Сессиядал 2009-йис патал кьабулнавай бюджетда дегишвилер туна.
Анал гуьгъуьнилай тешкиллувилин месэлайриз килигна, администрациядин аппаратда, бязи къурулушра са бязи дегишвилер туна.
Къейд авун лазим я хьи, сессиядал гьялзавай гьар са месэладиз депутатрин Собранидин председателдин заместитель Н. Ш. Абдулмуталибова ва райондин администрациядин Кьил, райондин Собранидин депутат Ш. Гь. Мегьамедханова дериндай къимет гана, абурун важиблувал къейдна, район абад, агьалийрин яшайишдин ва дуланажагъдин шартIар хъсан хьун – ибур сессиядал гьялай месэлайрилай, кьабулай къараррилай, абур дуьз ва менфятлувилелди кьиле тухунилай гзаф аслу жедайди къейдна, вири месэлайрай кIвалах хъсанардай меслятар къалурна.
Гьа иналди райондин депутатрин Собранидин сессияди вичин кIвалах акьалтIарна.