Малум тирвал, рекьера улакьрин гьерекат хатасузди авунин ва пассажиррин сагъламвал хуьн таъминарунин жигьетдай профилактикадин кIвалах хейлин артухарнаватIани, гьайиф хьи, автомобилрин рекьера гьар себебралди жезвай ДТП-рин ва абурун нетижада телеф жезвай, инвалидар яз амукьзавай инсанрин кьадар йисалай-суз артух жезва.
Ихьтин гьалдай экъечIун патал вуч серенжемар кьабулзаватIа чирун патал чи махсус мухбир и йикъара чи райондин къенепатан крарин отделдин патав гвай ГИБДД-дин начальник милициядин старший лейтенант Ш. А. Демировахъ галаз гуьруьшмиш хьана ва адавай и жигьетдай кьве гаф лугьун тIалабна.
Агъадихъ чна адан суьгьбет гузва.
- Эхь, эхиримжи йисара, кьилди къачуртIа, алай йисан сифтегьан паюна, вири уьлкведа ва республикада хьиз, чи райондин сергьятдани автомобилрин рекьера жезвай аварийрин, телеф жезвай ва я инвалидар яз амукьзавай инсанрин кьадар къвердавай гзаф жезва. И кардихъ са жерге себебарни авачиз туш. Кьилин себебарни ихьтинбур я: сифте нубатда улакьар гвайбуру рекьера хатасузвал хуьн таъминарунин къайдайрал ва истемишунрал гзаф дуьшуьшра амал ийизвач, технический гьал ахтармиш тавунвай улакьар гваз рекьиз экъечIзава ва я ички хъванваз машиндин рулдихъ ацукьзава, рекьера гьерекат авунин режим ва къайдаяр хуьнал амал ийизвач. Рекьер чеб авай гьалдални разивал ийиз жедач. Гзаф чкайра инсанар фидай тротуарар авач. Гьатта йифен вахтундани кьилдин ксарин мал-къара, гуьзчивилик квачиз шегьре рекьера жезва ва масабур.
Рекьера улакьрин ва пассажиррин хатасузвал хуьн таъминарунин мураддалди чи районда 11-августдилай 22-августдалди «Маршрутка» операция кьиле тухузва. И серенжемдин кьилин мурад рекьера хатасузвал хуьн таъминарун патал профилактикадин кIвалах гужлу авун я.
И вахтунда районда авай пассажирар тухузвай автобусрин ва маса маркайрин автомашинрин технический гьал ахтармишзава. Водителри рейсиниз фидалди вилик пассажирриз чеб рекье гьикI тухун лазим ятIа лугьун, гъвечIи аялар галай пассажирар вилик квай сиденийрал ацукьарун, пассажиррив абур физвай маршрутриз килигна проездной билетар хьун герек я.
Ихьтин улакьар гвайбурун сагъламвилин гьални ахтармишун лазим я.
И мукьвара ЦIийи кIелунин йисни башламиш жеда. Адахъ галаз алакъалу яз 1-сентябрдилай, виринра хьиз, чи райондани «Дети» месячник кьиле тухуда. Чна аялрин диде-бубайривай чIехи классра кIелзавай аялривай чи бицIекрал гуьзчивал тухун, абур гъил кьуна автомобилрин рекьерилай алудун тIалабзава. Чи балайрин сагъламвал, рекьера хатасузвал хуьн чалай гьар садалай гзаф аслу я. Гьелбетда, и жигьетдай улакьар идара ийизвайбуруни талукь тир веревирдер авун герек я.