(Эвел 36,37 нумрайра)
М. Мегьамедова В. Путинан фикир РФ-дин финансрин министерстводи Дагъустандиз куьмек агакьарун энгеларзавайдал желбна. Россиядин Гьукуматдин Председателди лазим къарар лап мукьвал йикъара кьабулдайдахъ инанмишарна.
23-август. Яракьлу къуватри, ополченцийрин куьмекни галаз, Тандо хуьр элкъуьрна гьалкъада кьуна. Ана вишев агакьна экстремистар ава. Гьалкъадай экъечIиз алахъайла, абуруз артиллерияди ва авиацияди цIай гана. Нетижада 28 бандит кьена, пар чIугвадай машин тергна.
Годобери, Ансалта ва Рахата хуьрерин патав гвай бандитриз 68 сеферда самолетрай ягъунар куьна. Са дот, миномет, зенитный установка, гуьзчивал тухудай кьве пост тергна. 140-далай виниз бандитар телеф хьана.
Шамил Басаева, кьиникьар гзаф хьанвайвиляй, чеченрин маса полевой командирривай Дагъустанда женгер чIугвазвайбуруз куьмек гун тIалабна.
Кремлда Президент Б. Ельцина ДР-дин Госсоветдин Председатель М. Мегьамедов кьабулна. Гуьгъуьнлай М. Мегьамедова лагьайвал, Президентди «Россиядин Гьукуматдиз Дагъустандиз атанвай бандитар тергунин патахъай лазим тапшуругъар гана».
РФ-дин Гьукуматдин Председатель В. Путина яракьлу къуватрин ведомствойрин руководителрихъ галаз совещание тухвана. Анал Кеферпатан Кавказда, эвелни-эвел Дагъустанда, арадал атанвай гьалариз къимет гана. Совещанидал катнавайбуруз куьмек гунин месэладизни килигна.
Махачкъаладин аэропортуна Россиядин МЧС-ди ракъурнавай мергьеметлувилин куьмекдин 42 тонн пар авай кьве самолет ацукьна. Гъанвай недай-хъвадай затIар ва сифте нубатда герек тир промышленностдин товарар виридалайни вилик ЦIумада ва Ботлих районрин агьалийрив агакьардайвал я.
24-август. И йикъара яракьлу къуватри ва ополченцийри бандитриз ягъунар кьун давамарна. Авиациядин ва артиллериядин куьмекдалди душмандин сенгерар ва маса мягькемарнавай чкаяр барбатIнава. Нетижада Ансалта, Рандо, Рахата, Ашино, Шодрода хуьрер бандитрин дестейрин амукьайрикай михьдай мумкинвал хьана.
И йикъан нянихъ боевикри кьунвай вири хуьрер азад хъувуна, чкадин администрацийрин ихтиярда хутуна. Бандитрин дестейрин амукьаяр, куьлуь паяриз чкIана, Чечня галай патахъди хъфизва.
25-август. Гьалар гьеле четинбур яз ама. Чечнеда Биляни, Ботани лугьудай чкайра, Гудермес шегьерда боевикрин чIехи къуватар кIватI жезвайдакай хабарар агакьзава. Махачкъаладиз Саратовский областдай кьиле губернатор Дмитрий Аяцков аваз чIехи делегация атана. Атанвай мугьманар ДР-дин Госсоветдин Председатель М. Мегьамедова кьабулна. Мугьманри катнавайбуруз куьмек яз гзаф кьадарда чими парталар, яргъанар, недай затIар, медикаментар гъана.
26-27-август. Ботлих районда гьалар яракьлу къуватрин гуьзчивилик ква.
ЦIумада ва Ботлих районра женгер куьтягь хьунихъ галаз алакъалу яз, ДР-дин Госсоветдин Председатель М. Мегьамедов республикадин телевиденидай вири дагъустанвийрихъ элкъвена рахана.
Россиядин Гьукуматдин Председатель В. Путина Дагъустанда ягъунрин сад лагьай пай акьалтIарна-вайдакай хабар гана.
Ада чпин кIвал-югъ хуьз къарагъай дагъустанвийриз ва Россиядин садвал патал женг чIугур яракьлу къуватриз и гъалибвал мубаракна.
В. Путин Дагъустандиз атана. Ада республикадиз хьанвай зиянар вичиз чкадал акуна кIанзавайдакай ва уьмуьр гуьнгуьна хтун патал гана кIанзавай куьмекрин кьадар тайинарун герек тирдакай лагьана.
Росссиядин ва дуьньядин общественностдихъ Дагъустанда физвай вакъиайрин гъавурда дуьздаказ тун патал дагъустанвийри чIехи алахъунар авуна. И вакъиайриз я «Кавказдин цIийи дяве», я «граждан дяве» лугьуз жедач. Россиядин армияди, хатасузвал хуьдай органри ва ополченцийри, къуватар сад авуна, чи государстводин чилел атанвай, хъсандиз яракьламиш хьанвай дестеяр, тергзава.