Алай йисан 11августдилай 36 миллион кас пенсионеррин зегьметдин пенсияр хкажнава. Гьар вацра гузвай пенсиядин страховой пай 7,5 процентдин артухарнава. Им йисан сифтедилай инихъ пенсияр 3-сеферда яз хкажун жезва: 1-мартдилай зегьметдин ва социальный пенсийрин базовый пай 8,7 процентдин хкажна, 1-апрелдилай лагьайтIа, пенсиядин страховой пай 17,5 процентдин артухарнава. Йисан эхирдалди 1-декабрдилай пенсийрал мад алава хъийида. Яни зегьметдин ва социальный пенсийрин базовый пай 31,4 процентдин хкажда.
Социальный къуллугърин гьисабрай йисан эхирдалди яшарай гузвай зегьметдин пенсиядин юкьван кьадар 6280 манатдив кьван, яни 35 процентдин хкаж жеда. Социальный пенсиядин юкьван кьадар яшамиш хьун патал чарасуз тир пулунин кьадардив сад жеда ва ада 4294 манат тешкилда.
Идалайни алава яз, алай йисан 1-августдилай кIвалахзавай пенсионеррин зегьметдин пенсийрал абуру Пенсионный фондуниз ганвай страховой взносрин гьисабдайни пул алава хъийида ва и кар гьар йисан 1-августдилай талукь къуллугъди вичи кьиле тухуда.
Мадни са алава. Са тIимил йикъарин вилик президентди къул чIугунвай Закондин бинедаллаз, советрин девирда авур кIвалахдин стаж фикирда кьуна, 2010-йисан 1-январдилай зегьметдин пенсийрал са сефердин аквадай хьтин кьадар пул алава хъижеда. Яни 1991-йисалди советрин девирда кIвалах авур гьар са йисай зегьметдин пенсиядал са процент пул алава хъийида.