Сулейман-Стальский район Республики Дагестан
www.old.suleiman-stalskiy.ru

Хайи Куьре абад хьунин рекье

Райондин кьилиз хайи халкьдин гележегдихъ рикI кузвай гьакъикъат регьбер тир Имам Яралиев хтайдалай инихъ алатнавай куьруь са вахтунда хайи Куьре абад хьунин, райондин экономика хкажунин, агьалийрин яшайишдин шартIар хъсанарунин, культура ва спорт вилик тухунин жигьетдай кар кьетIдай серенжемар кьабулунин и кардик чпин пайни кутун патал чпихъ хсуси еке такьатар ва мумкинвилер авай чи районэгьлияр-карчияр, инвесторар, меценатар тир чеб патарал яшамиш жезвай са жерге кьегьал рухваярни майдандиз акъудзава.

Ихьтинбурун жергедай яз, вичин тIвар кьун герек туш, кIанзавайди несилриз ядигар яз амукьдай са кар я лугьузвай ва вичин такьатрин гьисабдай Агъа ва Кьулан СтIалрин хуьрерихъ рехъ чара жезвай чкадал (къекъуьндал) алай пуд булахар къайдадик кутуна, аникай ял ядай гуьрчег са чка туькIуьрунин мураддалди, мергьеметлувилин къанунралди, 2 миллион манатдилай виниз пулунин такьатар чара авунвай кьегьал хцин баркаллу кар къейд ийиз кIанзава.
И кIвалах кьилиз акъудунин жавабдарвал вичин хивез къачузвай чи муниципальный райондин администрациядин кьилин заместитель – эмменидин ва чиликай менфят къачунин рекьяй муниципальный управленидин начальник Алискеров Назим Къурбановича вичихъ галаз хьайи суьгьбетда къейд авурвал, алай вахтунда анал махсус бригадади кIвалахзава. Виликдай анал гзафбуру чпин машинар чуьхуьз, экологиядиз еке зиян гузвай. Гила анаг улакьар тефидайвал элкъуьрна кIевда. Хъвадай гьамга яд пуд булахдай (пуд СтIалрин шартIунин лишан яз) пуд кварцяй къведайвал туькIуьрнава. Анал атай инсанри ял ядайвал ацукьдай скамейкаяр эцигда, юкьвални цин фонтан туькIуьрда. Булахдин чин тирвал хкажзавай цларал са вахтара чIехи шаир СтIал Сулеймана анал теснифай машгьур «Билбил» шиирдин чIалар лезги ва урус чIаларалди мармарда атIана, гьакIни шаирдин вичин баральеф алкIурда. А чка тирвал элкъвена мад верхи тарар акIурда, булахдин кьилел анал капI-тIеат ийидайбуруз къулай хьуй лагьана гъвечIи кIвал эцигда ва аваданламишунин маса кIвалахар тухуда.
Вири кIвалахар анал и месэла къарагъарунин инициатор тир муниципальный райондин Кьил И. М. Яралиеван гуьзчивилик кваз кьиле тухузва ва абур сентябрдин вацран эхирдалди куьтягьун кьетIнава.
Идахъ галаз сад хьиз, куьруь са вахтунда патав эцигнавай АЗС-ни алудна вахчунин, экологиядиз ганвай зиянни арадал хкунин месэла куьтягьда.
Чун чкадал фена кIвалахар кьиле физвай гьалдихъ галаз мукьувай таниш хьана. Анал бригадир Ражабов Рейзудинан регьбервилик кваз 4 касди эцигунрин кIвалахар кьиле тухузвай.
- Чи бригададин 3 касди алай вахтунда Герейханован хуьруьн 1-отделенида авай паркни къайдадик кутазва. Анаг мал-къара тефидайвал кIевна, ветеранриз ял ядай чкаяр, беседка туькIуьрда. И пуд булахдал ихьтин хъсан кIвалах гъиле кьуни чунни руьгьламишнава. ГьикI хьи, жуван гъилералди эцигна гележегдин несилриз ихьтин гуьрчег ядигар тунилай мадни еке бахт авач, - лагьана ада. – Анал атайбуру, и гуьзелвал, къулайвал акурла, и кар гъиле кьурдаз, такьатар чара авурдаз хьиз, и чка туькIуьрайбурузни чухсагъул лугьуда, хийир-дуьа ийида. Чухсагъул и кар гъиле кьунвай ва пул чара авунвай юлдашриз. Чна чи кIвалахни михьивилелди кьилиз акъудда.
 

Адрес статьи: http://old.suleiman-stalskiy.ru/?com=articles&page=article&id=1040