Лезгистанда чIехи хуьрерикай сад тир Куьредин «меркез» Кьасумхуьрел эхиримжи вахтара хъсанвилихъди еке дегишвилер кьиле физва.
Кьурагь ва Чирагъ вацIар сад-садак какахьзавай гуьзел чкада, такабурлу дагъларин ценерив экIя хьанвай Кьасумхуьр, гьакъикъатдани, шегьердиз ухшар хьанва. Кьвед-пуд мертебадин общественный дараматри, къайдадик кваз эцигнавай яшайишдин кIвалери, абурухъ галай багълари, асфальт цанвай гьяркьуь куьчейри, тарихдин имаратри хуьр гуьрчег къалурзава.
Зи фикирдалди, Кьасумхуьруьн виридалайни чIехи девлет чина берекатдин нур авай, сивел хъвер алай, зегьметдин къадир авай инсанар я. Ина са шумуд хуьруьн жемятар цIуд йисаралди хатурлу, гьуьрметлу яз яшамиш жезва.