И йикъара «Сулейман-Стальский район» муниципальный райондин Кьилин патав гвай агъсакъалрин Советдин заседание кьиле фена. Адан кIвалахда райондин администрациядин работникри, агъсакъалрин Советдин членри, хуьрерин поселенийрин ва агъсакъалрин Советрин кьилери, образованидин учрежденийрин руководителри, мискIинрин имамри иштиракна.
Заседанидал «Акьалтзавай несил руьгьдин ва патриотический руьгьдаллаз, ахлакь авайбур яз тербияламишунин рекьяй агъсакъалрин Советдин, ветеранрин организацийрин, общественный ва властдинни управленческий къуллугърин вилик акъвазнавай везифайрин гьакъиндай» месэладиз килигна.
Заседание райондин агъсакъалрин Советдин председаталь Халилбег Османович Асланова ачухна ва кьиле тухвана.
Гьялзавай месэладай анал райондин агъсакъалрин Советдин член, райондин имамрин Советдин председателдин заместитель Османов Фахрудин гьажиди гегьенш доклад авуна. Ада къейд авурвал, районда ахлакьдин, марифатдин, акьалтзавай несил савадлубур, Ватандал рикI алайбур, ахлакь-низам авайбур яз чIехи хьунин рекьерай тайин кIвалах тухузва. Райондин кьилиз Имам Музамудинович Яралиев атайдалай гуьгъуьниз и кIвалах иллаки хъсан хьанва.
Районда эхиримжи вахтара экономикадин, культурадин, социальный, аваданламишунин, эцигунрин, агьалийрин яшайиш ва дуланажагъдин шартIар хъсанарунин рекьерай еке кIвалах тухузва. И кIвалахрик уьмуьрдин еке рехъ фенвай агъсакъалри, ветеранрин организацийри чпин еке пай кутазва.
Ахлакьдин, марифатдин, жегьилар ватанпересвилин руьгьдаллаз тербияламишунин ва ихьтин маса месэлайриз агъсакъалрин Советдин заседанийрал са шумудра килигна, абурукай чкадин газетда макъалаяр чапна, Кьасумхуьруьн телевиденидай передачаяр гана.
Фахрудин Гьажи Османова гьялзавай месэладай райондин руководстводи, агъсакъалрин Советди, общественный тешкилатри тухузвай кIвалахрикай гегьеншдиз лугьунихъ, мисалар гъунихъ галаз санал, и рекьерай амай кимивилерикай, гьял тавунвай месэлайрикайни лагьана, са жерге меслятар къалурна, теклифар гана.
Заседанидал гьялзавай месэладай чпин фикирар анал рахай райондин имам Р. Рустамова, РУО-дин начальник Ж. Асланова, шаир Сажидина, райондин дяведин ветеранрин Советдин председатель М. Гьасанова, Герейханован хуьруьн ветеранрин Советдин председатель В. Жамалдинова, райондин администрациядин кьилин 1-заместитель М. Агьмедова ва маса юлдашри лагьана.
Заседанидин нетижаяр Х. О. Асланова кьуна. Эхирдай анал гьялай месэладай талукь къарар кьабулна. (Ам агъадихъ гузва).