Шад жедай кар я хьи, эхиримжи вахтара районда спортдин ва физкультурадин кIвалахдиз кьилин фикир гузва. Идан нетижа яз райондин спортсменри къуршахар кьунай, армспортдай, боксдай, дзюдодай, каратэдай ва спортдин маса жуьрейрай республикада, уьлкведа ва адалай къеце тухузвай чемпионатрани турнирра кIвенкIвечи чкаяр кьазва.
Райондин гзаф хуьрерин школайрани спортдин секцияр, филиалар ачухнава. И рекьяй Герейханован 1-нумрадин юкьван школада тухузвай кIвалах тариф авуниз лайихлу я. ИкI, физкультурадин тарсар гузвай муаллим Жавид Сарабиди (ам иранви я) 2001-йисуз школада «Белая ладья» тIвар алаз шахматринни шашкайрин клуб тешкилна. Гуьгъуьнлай адакай столдал къугъвадай теннисдин клубни хьана. Ана шахматрал, теннисдал машгъул жезвайбурни рушар я. Теннисдай школадин командадихъ галаз акъаждайбур районда авач, са шумуд руша республикадин дережадин турнирра агалкьунар къазанмишна. Кьилди къачуртIа, Жавид Сарабидин тербиядик кваз вердишвилер къачур Гьажиханова Заринади алай йисуз Махачкъалада столдал къугъвадай теннисдай кьиле фейи республиканский турнирда приздин 2-чка кьуна.