3-августдиз «Сулейман-Стальский район» муниципальный тешкилатдин администрациядин нубатдин заседание кьиле фена. Адан кIвалахда администрациядин управленийрин, отделрин, организацийрин руководителри, хуьрерин поселенийрин кьилери, школайрин директорри иштиракна.
Заседанидал агъадихъ галай месэлайриз килигна:
1. Школаяр цIийи кIелунин йисаз гьазур хьунин ва образованидин учрежденийра ремонтрин кIвалахар кьиле физвай гьалдин гьакъиндай.
2. Жуьреба-жуьре месэлаяр.
Заседание «Сулейман-Стальский район» муниципальный райондин Кьил Имам Музамудинович Яралиева ачухна ва кьиле тухвана.
«Школаяр цIийи кIелунин йисаз гьазур хьунин ва образованидин учрежденийра ремонтрин кIвалахар кьиле физвай гьалдин гьакъиндай» месэладай анал райондин образованидин управленидин начальник Ж. А. Асланова доклад авуна. Ада къейд авурвал, муниципальный райондин администрацияди школаяр цIийи кIелдай йисаз гьазурунин ва школайра ремонтрин кIвалахар тухунин рекьерай тайин кIвалах тухузва. Алай вахтунда районда умуми образованидин 57 учреждение: сифтегьан 7, основной 8, юкьван 26 школа, аялрин яратмишунрин 1 КIвал, Кьасумхуьруьн 1-нумрадин СОШ-дин бинедаллаз нянин школа, школадиз фидалди яшда авай аялрин 11 учреждени ава.
Санлай къачурла, районда кIелунин 68 корпус ава. Докладчиди къейд авурвал, абурукай щитрикай кIватIнавай 11 корпус ишлемишунин вахт алатнавайбур, 26 алатай асирда-40-50-йисара эцигнавайбур, 42 корпус цIаяр кьунриз ва санитарный къайдайриз жаваб тагузвайбур я. Абур ишлемишунин 2-3 вахт алатнава. КIелдай корпусар 2009-2010-кIелунин йисаз гьазурунин рекьяй Эминхуьруьн, Герейханован 2-нумрадин, ЦIийи поселокдин, Кьасумхуьруьн 2-нумрадин, Алкьвадрин, Сардархуьруьн, Уллу-Гъетягърин, Испикрин школайра гьалар чIуру я. Кьасумхуьруьн, Герейханован ва Курхуьруьн 1-нумрайрин, ЦIийи Макьарин школайра къазанханаяр (котельнияр) ва чими ийидай система ремонт авунин ва цIийибур тухунин чарасузвал ава.
Санлай къачурла, алай вахтунда райондин образованидин 75-80 процент учрежденияр капитальнидаказ ремонт хъувуна кIанзава.
РУО-дин начальникди вичин рахунра къейд авурвал, районда школадиз фидалди яшда авай аялрин 11 учреждение кардик ква. Анриз 3 йисалай 7 йисалди къведалди яшара авай аялрин анжах 16 процент желбнава. ДаркIуш къазмайрал, АгъастIал къазмайрал, Кьасумхуьрел, Зизика ва Испика аялрин бахчаяр эцигунин чарасузвал ава.
Гьалтзавай четинвилеризни килиг тавуна, давамарна Ж. Асланова, РУО-дин бюджетдик кутунвай пулунин такьатриз килигна, управлениди образованидин учрежденийра сифте нубатдин ремонтрин кIвалахар кьиле тухузва. ИкI, образованидин вири 57 учрежденида ремонтар авун патал 1 миллионни 200 агъзур манатдин къимет авай ширер, киреж ва гуьзгуьяр хканва. Сардархуьруьн СОШ-да къавар, полар дегишарзава. И кIвалахриз 1 миллион манат пул чара авунва.
ЦIийи Макьарин СОШ-да чими ийидай система ремонт авунин, пищеблок эцигунин ва тадаракламишунин, Кьасумхуьруьн 1-нумрадин СОШ-да пожарный водоем ремонт хъувунин, пищеблок, учительский, актовый зал тадаракламишунин, дакIарар пластикадинбуралди дегишарунин, Вини СтIалрин, Герейханован, НуьцIуьгърин аялрин бахчайра пищеблокар тадаракламишунин, дараматар ремонт хъувунин кIвалахар тухузва. Анриз пулунин бес кьадар такьатар ахъайнава. Вири учрежденийра 30-40-50 процентдин ремонтрин кIвалахар тухванва. И кIвалахар давамни ийизва.
Пландин бинедаллаз, образованидин учрежденийра ремонтрин кIвалахар 2009-йисан 20-августдалди тухвана акьалтIарда,- лагьана вичин рахунрин эхирдай Ж.А.Асланова.
И месэладай анал вичин фикирар Имам Музамудинович Яралиева лагьана. Ада къейд авурвал, алатай кIелунин йисав гекъигайла, цIи школаяр ремонт авунин кIвалахриз 5 сеферда артух пул чара авунва. Идани райондин руководстводи и хилез кьилин фикир гузвайдан гьакъиндай шагьидвал ийизва. Гележегдани и кар давамда. Чахъ къведай йисуз цIийи 2-3 школа эцигиз гъиле кьадай фикирни ава.
РУО-дин руководстводи школайра тухузвай ремонтрин кIвалахрин еридидал, абур вахтунда тухвана акьалтIарунал гуьзчивал тухун, кIвалахрин еришар йигинарун лазим я.
Заседанидал райондин центральный больницада ремонтрин кIвалахар кьиле физвай, медработникри агьалийрин сагъламвал хуьн ва мягькемарун патал кIвалахзавай гьалдин гьакъиндай месэладизни килигна. И месэладай рахай И.М. Яралиева больницада рехъ гузвай хейлин кимивилерикай, духтурар чпин хиве авай везифайрив жавабдарсузвилелди эгечIзавайдакай лагьана.
Гьа са вахтунда, къейдна Имам Музамудиновича, райондин руководстводи ЦРБ ремонт авуниз, духтурриз кIвалахдай шартIар яратмишуниз кьилин фикир гузва. Тек са ремонтрин кIвалахриз алай йисуз 40 миллион манат пул чара авунва. Райондин больница Кьиблепатан Дагъустанда хъсанбурукай садаз элкъуьрда, аниз цIийи мебель, герек маса тадаракарни хкида.
И. М. Яралиева къейд авурвал, больницада чIуру кIвалахриз, кимивилериз рехъ гузва. Санлай къачурла, агьалияр духтуррин кIвалахдилай нарази я. Духтурри больницадиз къвезвай инсанривай пул къачузвайдакай, аваз-аваз дарманар тагузвайдакай, са йисал къведалди яшда авай аялриз гьукуматди пулсуз ахъайзавай дарманар, недай продуктар (некIедин гъуьр ва масабур) аялрал агакь тийизвайдакай, хейлин маса кимивилерикайни лагьана, ЦРБ-дин руководстводин вилик кIвалахар хъсанарунин, кимивилер арадай акъудунин рекьерай кIеви ва тайин везифаяр эцигна.