И йикъара районда авай общественный тешкилатрикай сад тир райондин динэгьлийрин Советдин нубатдин заседание кьиле фена. Аниз хуьрерин мискIинрин имамрилай гъейри райондин векилриз ва жегьил динэгьлийризни теклифнавай.
Заседанида гьакI райондин имам Шамсудин-гьажиди, хатасузвилин рекьяй райадми-нистрациядин кьилин заместитель С. М. Велиева, РОВД-дин начальникдин заместителар тир Х. Закарьяева, Б. Ягъибегова, РУО-дин начальникдин замес-титель Къ. Аминова, гьакIни 2 кас милициядин участковый инспекторрини иштиракна.
Заседанидал вичи ганвай арзадин бинедаллаз Ичинрин хуьруьн мискIиндин имам Рустамов Ариф райондин динэгьлийрин Советдин членвилин ва адан председателдин заместителвилин везифайрикай азад авуна.
Адан чкадал райондин имам Шамсудин-гьажидин теклифдалди, ачух сесер гуналди, Кьасумхуьруьн мискIиндин имам Рустамов Рамазан Багьаудинович хкягъна.
Заседанидал Агъа СтIал къазмайрин мискIиндин имам Ибрагьимов Мегьамедсалигь-гьажи рахана. Ада экстремизмдиз рехъ тагун патал диде-бубайри, муаллимри, хуьрерин администрацийри, динэгьлийри, агъсакъалри, участковый инспекторри ва вири общественности са макьсаддихъ рекье тунвай тербиядин ва профилактикадин кIвалах тухун герек тирди къейдна.
И месэладай анал гьар хуьрерай анрин мискIинрин имамар, участковый инспекторар, жегьил динэгьлияр рахана. Гуьгъуьнлай анал и важиблу месэладай чпин фикирар ва теклифар гваз гьакI РУО-дин начальникдин заместитель Къ. Аминов, РОВД-дин начальникдин заместитель Х. Закарьяевни рахана.
Заседанидал алай и ва гуьгъуьнин месэлайрай анал куьруь информацияр гваз Алибегов Жалил-гьажи, Кьасумхуьруьн мискIиндин имам Рустамов Рамазан-гьажи ва эхирдайни райондин имам Абдулмуталибов Шамсудин-гьажи рахана, заседанидал гьялай месэлайрин гьакъиндай вичин фикирар лагьана.
Заседанидал гьялай месэлайрай талукь къарарар кьабулна.