СтIал Сулейманан тIварунихъ галай Кьасумхуьруьн 1- нумра-дин юкьван школа районда вичихъ еке тарих авай школайрикай сад я. Ина чирвилер ва тербия къачур, гуьгъуьнилай чпикай алимар хьайи, республикада, уьлкведа лап чIехи дережайрин руководи-телар яз кIвалахзавай инсанрин тIварар кьаз кIан хьайитIани, сиягь (список) лап яргъиди жеда. И кар квехъ галаз алакъалу я? Гьелбетда, школада вири йисара чпихъ дерин чирвилер авай муаллимри кIвалах авурвиляй. 100- дав агакьна муаллимри кIвалахзавай, 725- далай виниз аялри кIелзавай школада хъсан муаллимар, лугьудайвал, чпин пешедин халис устадар, къени ава. Абурукай яз чавай школада ингилис чIалан тарсар гузвай муаллим Закиряева Гуляра Гьажиевнадин тIвар кьаз жеда.
Г.Закиряева Салиянрин хуьре дидедиз хьана. Амма адан аял ва гуьгъуьнин хейлин йисар Турк-мениядин меркез Ашхабад ше-гьерда акъатна.
- Къе вичикай къецепатан уьлкве хьанвай Туркменистанда гьа йисара, чIехи ва къудратлу Советрин Союздин союзный республика яз, гзаф лезгияр яшамиш жезвай,- суьгьбетзава Гуляра Гьажиевнади.- Гьабуру-кай яз чи хзанни ана яргъалди яшамиш хьана.
Салиянви лезги руша Ашха-баддин юкьван школа, 1983- йисуз Туркменистандин государстводин университетдин къецепатан чIаларин факультет лап хъсан къиметар аваз акьалтIарна. Гуьгъ-уьнилай Г. Закиряевади Ашха-баддин 3- нумрадин юкьван школада са шумуд миллетдин векилрин аялриз ингилис чIалан тарсар гана.
1994- йисалай инихъ Гуляра Гьажиевнади Кьасумхуьруьн 1- нумрадин юкьван школада муал-лимвиле кIвалахзава, лезги аялриз ингилис чIалан сирер чирзава.
Школадиз фейила, чна са шумуд муаллимдихъ галаз суьгьбетар авуна. Тежрибалу муаллимдин кIвалахдилай абуру разивал ийизва.
-Школадиз кIвалахиз хтай сифте йикъарилай Гуляра Гьажиевнади вич дерин чирвилер авай, аялрал рикI алай муаллим яз къалурна,- лугьузва школадин тешкилатчи Кьасумова Айишат Къурбаналиевнади. - Акьалтзавай несилдиз дерин чирвилер ва тербия гунилай гъейри, ада аялар ватанпересвилин руьгьдаллаз тербияламишунин, абур чIехид-гъвечIид чидайбур яз чIехи авунин ва маса рекьерайни еке кIвалах тухузва.
Чна ихьтин са кардизни фикир гана. Муаллимдиз аялар хьиз, аялриз Гуляра Гьажиевнани гзаф кIанда.
-Гуляра Гьажиевна чи классдин руководитель яз им 5- йис я,- лугьузва 11 «а» классда хъсан къиметар аваз кIелзавай Таибова Эммади.- Муаллимди тарс тухудайла, вири аялри адахъ дикъетдивди яб акалда. Хъсандиз кIелунни ада чавай гьамиша истемишзава. Чаз чизва: вири зегьметар ада чакай халис инсанар хкатун патал чIугвазва. Ам чаз гьар са карда чешне я.
Г. Гь. Закиряева руководитель тир 11 «а» класс кIелунин ва ахлакьдин рекьяй школада хъсан гьисабда ава. Гзаф аялри хъсан ва лап хъсан къиметар аваз кIелзава, райондин школьникрин олим-пиадайра кIвенкIвечи чкаяр кьазва.
Гуляра Гьажиевнадихъ галаз суьгьбет ийидайла, за ихьтин са карни кьатIана. Вичикай рахун (тариф авун анихъ амукьрай) муаллимдиз хуш туш.
-Аялар чи гележег я, абуруз хъсан тербия, дерин чирвилер гун гьар са муаллимдин кьилин везифа я,- лугьузва Г. Закиряева-ди.- Жува тарс гайи аялрикай чирвилер авай пешекарар, Ватандиз вафалу инсанар хьун- им гьар са муаллимдин кьилин винизвал ва шадвал жеда.
Школада хьиз, Гуляра Гьажи-евнадиз аялрин диде- бубайрин патайни еке гьуьрмет ава. Хуьре- кIвалени ам виридаз сейли я.
Гуляра Гьажиевнадихъ вирида гьуьрметзавай хзан- уьмуьрдин юлдаш, чпин кIвалин- къан иесияр хьанвай кьве велед (гадани руш) ава. Эхь, мисалда лугьузвайвал, муаллим вири патарихъай чешне хьана кIанда- къе чна вичикай куьрелди суьгьбет авур Гуляра Гьажиевна хьиз.
