Лезгийрин СтIал Сулейманан тIварунихъ галай государстводин музыкадинни драмадин театрдин коллективди вичин 102-цIийи сезон чеченрин автор М. Агьмедован «Жанавурдин тум» къемедадалди ачухна. Алай вахтунда и тамаша артистри хуьрера къалурзава. Лагьана кIанда хьи, тамаша режиссер, РФ-дин лайихлу артист Э. Наврузбегова эцигна, художник Д. Исакьов, композитор Н. Шагьмурадов, кьуьлер эцигайди К. Бебеков я.
ЦIийи тамаша гваз артистар мукь-вара Эминхуьруьз мугьман хьана. «Жанавурдин тум» къемеда чи девирдин йикъариз талукьди я. Ана алай аямдин дуьз рехъ тухуз манийвалзавай угърияр, чапхунчияр, тарашчияр негьзава. Тамашадик хъуьруьнар, шад манияр, кьуьлерни гзаф ква.
РФ-дин лайихлу артист А. Магьсудова (Возраил), ДР-дин халкьдин артист И. Рамазанова (Исрафил), ДР-дин лайихлу артистар тир Ф. Зейналовади (Санет), М. Магьмудова (Маха), А. Агъаханова (Завалу), Ш. Закерьяева (Багор), П. Азизовади (Бике) ва артистка Н. Агъасиевади (Мубарик) тамамарай ролар хьиз, санлай цIийи тамашани Етим Эминан ватанэгьлийриз гзаф бегенмиш хьана.
Мугьман хьунай эхирдай хуьруьн поселенидин кьил Р. Рамазанова артис-триз рикIин сидкьидай чухсагъул лагьана.
