Мукьвара Махачкъалада 1993-1995-йисара дидедиз хьайи жаванрин арада Дагъустан Республикадин кIвенкIвечивал патал самбодай акъажунар кьиле фена. Республикадин шегьеррайни районрай атанвай 300-дав агакьна спортсменрихъ галаз ана Кьасумхуьруьн самбодинни дзюдодин школада вердишвилер къачузвай са шумуд жегьил пагьливандини иштиракна. Абуру чпихъ спортдин и жуьредай устадвал ва алакьунар авайди къалурна. Кьилди къачуртIа, чи жегьил спортсменар тир Ислам Исрафилова (78 кг.) 1, Алим Алискерова (68 кг.) 3-чкаяр кьуна. Абуруз медалар, талукь дережайрин Дипломар гана.
И. Исрафилова, А. Алискерова ва и турнирда 5-чка кьур Р. Лукьманова гила Армавир шегьерда кьиле фидай Кьиблепатан Федеральный округдин чемпионатда иштиракда.
Чи спортсменри къазанмишнавай агалкьунрик машгьур спортсменар-тренерар тир Рамазан, Юрий ва Тельман Къурбановрин зегьметдин еке пай ква.