Дагъустандин халкьдин шаир СтIал Сулейманан 140 йисан юбилейдиз гьазурвилер акунин серенжемрин сергьятда аваз шаирдин мемориальный КIвал-музей ремонт авун ва дараматдин вилик квай чкаяр къайдадик кутун патал муниципальный райондин Кьил И. М. Яралиева Дагъустан Республикадин Гьукуматдивай пулунин куьмек тIалабунин мураддалди ракъурай Чарчиз жаваб яз Республикадин Гьукуматдин теклифдалди 11-мартдиз чи райондиз ДР-дин культурадин министерстводин векилвилер гваз государстводин заказар къайдадик кутадай ва материально-технический рекьяй таъминардай отделдин начальник Къурбанов Мухтар Аммаевич ва федеральный программайрихъ, муниципальный идарайрихъ галаз кIвалах тухудай отделдин начальник Абакарова Патимат Мегьамедовна мугьман хьана.
Абур муниципальный райондин администрациядин кьилин заместитель Гь. М. Гьажиагьмедова кьабулна.
Суьгьбетдин вахтунда малум хьайивал, «Сулейман-Стальский район» муниципальный райондин Кьил Имам Музамудиновича Дагъустандин халкьдин шаир СтIал Сулейманан 140 йисан юбилейдихъ галаз алакъалу яз адан хайи ватанда – Агъа СтIалдал – республикадин метлеб авай шадвилин мярекатар вини дережада аваз кьиле тухунин мураддалди шаирдин КIвал-музейдихъ галай алава чкаяр (шаирдиз багъишай автомашин хуьзвай гараж, маса чардахар), гьакIни анин гьаятар, заборар (чахчахар) ремонт авун патал республикадин бюджетдай герек пулунин такьатар чара авунин патахъай ДР-дин Гьукуматдиз рекье тунвай Чарче гъанвай теклифар хъсанбур яз гьисабна ва и рекьериз ДР-дин Гьукуматди 916 агъзур манат пул чара авунва (адан 20 процент райондин бюджетдин гьисабдай).
Гуьгъуьнлай абур культурадин ва информациядин управленидин начальникдин заместитель Т. М. Султанагьмедов, чкадин газетдин ва телестудиядин работникарни галаз Агъа СтIалдал шаирдин музейдиз фена. Анал абуру музейдин илимдин къуллугъчи Фейзудин Мамедовахъ галаз санал анаг авай гьал ахтармишна, гьар садан теклифрихъ яб акална ва а такьатрин гьисабдай тамамардай кIвалахрин кьадар, абур кьилиз акъуддай вахтар, жавабдар ксар тайинарна.
Ахпа и гъвечIи делегация Кьулан СтIалрин Россиядин Игит Радим Халикьован тIварунихъ галай умуми образованидин юкьван школадиз мугьман хьана.
Анал М. А. Къурбанова 2006-йисуз акъудай ДР-дин Президентдин Указдин бинедаллаз жуьреба-жуьре женгерин гьерекатра телеф хьайи Россиядин Игитвилин тIвар ганвай 6 кас дагъустанвийриз абурун хайи Ватанра алай йисан 1-сентябрдалди гуьмбетар-буьруьнждин бюстар эцигунин тапшуругъ ганвайди къейдна ва школадин директор А. Ш. Абдусемедовахъ галаз санал школадин вилик ам эцигдай чка тайинарна. И кардай школадин директорди республикадин руководстводиз чухсагъул лагьана.
Муькуь мугьман, П. М. Абакарова, и юкъуз райондин Культурадин Дворец ва библиотека авай гьалдихъ галаз таниш хьана.