Кьилдин ксари, хуьруьн майишатдин карханайри, лежбервилинни фермервилин майишатри хуьзвай мал-къарадин, лапагрин кьадар къвердавай артух жезва. Абурун сагъламвал хуьн, абурук акатзавай азаррин вилик пад кьун патал райондин ветеринарный управленидин пешекарри вуч кIвалах тухузва, гьихьтин серенжемар кьабулзава? И суалриз жавабар гун «Куьредин хабарар» газетдин экономикадин отделдин зеведиш Х.Кьасумова райондин ветуправленидин начальник Назир Абдулкъафаровавай тIалабна.
-За 2001 йисалай управленидин начальникдин везифаяр кьилиз акъудзава,- башламишна Н.Абдулкъафарова.- Управленидик 8 участок акатзава. Вири санлай кьурла, анра 33 касди кIвалахзава, абурукай 29 кас чпихъ махсус образование авай, кIвалахдин гъавурда авай пешекарар я.
Лагьана кIанда, чи работникрин вилик акъвазнавай везифайрин кьадар гзаф я. Абур кьилиз акъудун патал еке кIвалахни тухузва. Ам гзаф терефрикай ибарат я.
Санлай къачурла, райондин агьалийрихъ ва карханайрихъ 43200- дав агакьна ири ва куьлуь карч алай гьайванар, 27500- далай виниз кIвалин къушар ава. Абурун сагъламвал хуьн, мягькемарун, азаррин вилик пад кьун патал чна кIвалах виликамаз туькIуьрнавай махсус пландин бинедаллаз кьиле тухузва. План Дагъустан Республикадин ветеринарный управлениди тестикьарзава.
Мал- къара, кIвалин къушар патал брюциллез, сибирдин хер, чахутка, пехъи хьун, яшур хьтин азарар хаталу я. Лугьуз кIанзава хьи, ихьтин азарар районда пайда тахьана 10- 12 йис я. Эгер абур пайда хьайитIа, малар, лапагар, къушар сагъарун патал дарманар чаз республикадин ветуправленидай ахъайзава.
ЦIаяр атунин, чумадин, хпин хьунин ва къушарин гриппдин азаррин вилик пад кьун патал чна вахт- вахтунда талукь серенжемар кьиле тухузва. ИкI, пешекарар мукьвал- мукьвал хуьрериз физва, махсус пландин бинедаллаз малариз, лапагриз, кIвалин къушариз рапар язава, дарманар гузва, халкьдин арада гъавурда тунин кIвалах тухузва.
Гьелбетда, гьар са карханада, гьар са организацияда кIвалахар вилик фин - им ана кIвалахзавай пешекаррилай, абурун зегьметдилай, чирвилерин дережадилай гзаф аслу я. Завай лугьуз жеда хьи, чи управленида чпин хиве авай везифаяр намуслудаказ кьилиз акъудзавай пешекарар гзаф ава. Абурукай завай Ибремов Меликан, Мамерзаев Мамерзадин, Рамазанов Назиран ва масабурун тIварар кьаз жеда.
Гьелбетда, завай чи вири кIвалахар туькIвенва, вилик месэлаяр кумач лугьуз жедач. Гьялиз тахьанвай месэлаярни ама.
Дагъустан Республикадин ветуправлениди, райондин руководстводи чаз кIвалахда куьмекар гузва. Абурун куьмекни галаз, вилик акъвазнавай месэлаяр кьилиз акъудиз жедайдахъ чун инанмиш я.