Алатай киш юкъуз, 28-мартдиз, администрациядин къарардалди райондин сергьятда михьивилер авунин мураддалди субботник кьиле тухвана.
Субботникда, вири санлай кьурла, 2 агъзур касдилай виниз къуллугъчийри ва хуьрерин агьалийри иштиракна.
Абуру чпи кIвалахзавай идарайрин ва организацийрин дараматрин, яшайишдин кIвалерин вилик квай чкаяр, куьчеяр зирзибилдикай михьна, салара гатфарин бязи кIвалахар кьиле тухвана.
Субботникда активвилелди иштирак авурбурун жергедай яз райадминистрациядин, райцентрдал алай административный дараматда авай къуллугъчийри, «сельсовет Касумкентский» МО-дин, культурадин Дворецдин, райондин аптекадин, Кьасумхуьруьн 1-нумрадин аялрин ясли-бахчадин, ЦГСН-дин, райбольницадин ва маса идарайрин работникрин тIварар кьаз жеда.
Гьа са вахтунда алишверишдин идарайрин работникри, хсуси туьквенрин иесийри, гзаф хуьрерин муниципальный тешкилатрин работникри, агьалийри и карда зайифдаказ иштиракна.
Райадминистрациядин теклифдалди 23-майдалди гьар киш юкъузни субботникар кьиле тухуда.