30-мартдиз «Сулейман-Стальский район» муниципальный тешкилатдин администрациядин нубатдин заседание кьиле фена. Адан кIвалахда райондин администрациядин управленийрин, организацийрин, карханайрин руководителри, хуьрерин поселенийрин кьилери, теклифнавай маса юлдашри иштиракна.
Заседание «Сулейман-Стальский район» муниципальный тешкилатдин Кьил Имам Музамудинович Яралиева ачухна ва кьиле тухвана.
Заседанидал «Райондин сергьятда газ тухванвай линияр менфятлувилелди ишлемишунин гьакъиндай», «Санитариядин ва михьивилер хуьнин рекьерай законрал амал авунин гьакъиндай» ва жуьреба-жуьре маса месэлайриз килигна.
«Райондин сергьятда газ тухванвай линияр менфятлувилелди ишлемишунин гьакъиндай» анал райондин капитальный эцигунрин ва ЖКХ-дин управленидин начальник З. Гь. Гьажимирзоева информация авуна. Ада къейд авурвал, хуьрер, агьалияр газдалди таъминарун, газдикай, гьакI ам тухванвай линийрикай дуьз менфят къачун – им районда важиблу месэлайрикай сад я. И рекьерай кIвалахар хъсанарун патал райондин руководстводи еке кIвалах тухузва, гележегдани кIвалах хъсанарун патал серенжемар кьабулда.
Гьа са вахтунда, докладчиди къейд авурвал, хуьрер газофицировать авунин рекьяй вилик йисара авунвай, гила тухузвай кIвалахриз килигайла малум жезвайвал, и рекье кимивилер, гьял тавунвай месэлаярни гзаф ава. ИкI, хуьрера газдин линияр гьарда вичиз кIандайвал, хатасузвилин къайдайрал амал тавуна тухузва. Санлай къачурла, районда 275 километрда газдин линияр тухванва. Идакай анжах 170 километр линияр райондин хсусиятда ава. Гзаф хуьрера газдин линияр виликан йисара совхозри, колхозри чпин такьатралди тухванвайди я. ЯтIани абур республикадин «Даггазсервис» ООО-дин балансдал ала.
Алай вахтунда рехъ гузвай кимивилериз килигайла ва кIвалах хъсанардай рекьер веревирд авурла райондин руководстводихъ газофикациядин линияр райондин хсусиятдиз вахчудай фикир ава. Им дуьз карни жеда.
Заседанидал рахай ЦIийи Макьарин ва КIварчагърин поселенийрин кьилер тир А. Къазиагьмедова ва А. Сефибегова хуьрера газдин линияр тухунин рекьяй рехъ гузвай кимивилерикай лагьана ва газофикациядин линияр райондин хсусиятдиз вахчунин тереф хуьзвайди къейдна.
- Гьелбетда, заседанидал алай месэла важиблуди я, - къейдна Имам Музамудиновича. – Эхиримжи вахтара са ни ятIани, ЗАО-яр, ООО-яр я лугьуз, хуьрериз къвез газдин линияр тухузва, са 100 метрдиз тухвайтIа, 2-3 километрдиз тухванвайди къалурзава. Мадни, вилик йисара совхозрини колхозри тухванвай линияр чпи тухванвайди къалурзава. Гьа ихьтин чинебан документар туькIуьриз, абуру миллионралди пулар незва. Къвезва хуьрериз газдин линияр тухуда лугьуз инсанар, абур гьинай я, вужар я? – и кар я хуьрерин поселенийрин кьилериз, я райондин руководстводиз чизвач. Я газдин линияр тухун патал заказ гайи организацияни чир жезвач.
Ихьтин тапарралди чуьнуьхзавай пулар хийирдин ваъ, чIуру рекьериз физвайдини сир туш.
Ихьтин чIуру гьаларал эхир эцигун патал хуьрерин поселенийрин кьилери, талукь маса къуллугъри газдин линияр ни ва мус тухванватIа тади гьалда чирун, абур администрацийрин балансдал хкун лазим я.
Заседанидал алай «Санитариядин ва михьивилер хуьнин рекьерай законрал амал авунин гьакъиндай» месэладай райондин администрациядин кьилин заместитель С. М. Велиева информация авуна.
Докладчиди лагьайвал, эхиримжи 1-2 йисан къене районда санитариядин ва михьивилер хуьнин рекьерай хъсанвилихъди дегишвилер кьиле фенва. Хуьрерин агьалияр, идарайрин, карханайрин пешекарар, чIехи классра кIелзавай аялар желбна хуьрера, рекьин къерехра михьивилер авуна. ЯтIани, и рекьяй кимивилерни амачиз туш. Рекьин къерехра, хуьрера какатай чкайрал зирзибил гадарзава. Гзаф хуьрера зирзибил, амукьаяр гадардай чкаяр чара авунвач. Хуьрерин поселенийрин кьилериз, талукь маса къуллугъриз тапшуругъар ганватIани, амукьаяр, кьейи малар чилик кутадай махсус чкаяр (скотомогилникар) туькIуьрна акьалтIарзавач.
И ва маса кимивилерикай лугьуналди, С. М. Велиев санитариядин къайдайрал амал авунин, михьивилер хуьнин рекьерай хъувуна кIанзавай кIвалахрални гегьеншдиз акъвазна.
Заседанидал гьялзавай и месэладизни И. М. Яралиева дериндай баянар гана. Ада къейд авурвал, михьивал – им сагъламвилин замин я. Виликан йисарив гекъигайла, санитариядин рекьерай кIвалахар хейлин хъсан хьанватIани, хъувуна кIанзавай кIвалахарни гзаф ава. ИкI, ДаркIуш къазмайрилай башламишна, Сардархуьруьз кьван рекьин къерехар зирзибил вегьена чиркинзава. И рекьяй Герейханован хуьруьн сергьятда лап чIуру гьал ава. Хуьрера, идарайрин сергьятра михьивилер авунин мураддалди 28-мартдиз (киш юкъуз) районда субботник тухвана. Ихьтин субботникар районда 23-майдалди гьар киш юкъуз тухуда. Талукь распоряжение гьазурда.
Заседанидал районда авай государстводин учрежденийрин, идарайрин работникрин кIвалахдиз къимет гунин рекьяй тухвай ахтармишунрин нетижайрин, карханаяр, хуьрерин агьалияр дигидай целди таъминарун патал УОС-дин вилик акъвазнавай везифайрин, Сардархуьр-ДаркIуш къазмаяр водоводдин эцигунрал арадал атанвай гьаларин, хуьрерин поселенийриз пулар чара авунин гьакъиндай ва маса месэлайризни килигна. И месэлайрай Имам Музамудинович Яралиев рахана, и рекьерай арадал атанвай гьалариз дериндай къимет гана, рехъ гузвай кимивилер къейдна, кIвалахар хъсанарунин рекьяй идарайрин, организацийрин руководителрин, талукь маса къуллугърин вилик тайин везифаяр эцигна.
Заседанидин эхирдай Имам Музамудинович Яралиева яргъал йисарин намуслу зегьметдай «Россельхозцентр» ФГУ-дин Кьасумхуьрел алай районрин уртах филиалдин начальник Р. А. Шагьмирзоевав РФ-дин хуьруьн майишатдин министерстводин, райондин культурадин ва информациядин управленидин начальник Т. А. Рамазановав, Культурадин Дворецдин къуллугъчи-манидар А. Б. Агъарагьимовав Дагъустан Республикадин культурадин министерстводин Гьуьрметдин грамотаяр вахкана, абуруз и наградаяр мубаракна ва абурухъ кIвалахда мадни чIехи агалкьунар хьана кIанзавайди лагьана.
