Райондин муниципальный тешкилатдин ва райондин депутатрин Собранидин къарардалди, малум тирвал, алай йис Дагъустандин халкьдин шаир СтIал Сулейманан йис яз малумарнава.
Курхуьруьн 2-нумрадин юкьван школадин руководстводи (директор ДР-дин халкьдин муаллим Н. Алхасов, чкадин комитетдин председатель Гь. Шихбабаев) саналди шаирдин юбилейдин гьуьрметдай кьилдин план туькIуьрнава.
Кьиле тухузвай серенжемрин жергедай яз чIехи классра СтIал Сулейманан уьмуьрдиз, адан яратмишунриз талукь яз лап хъсан сочинение кхьинин, шаирдин шиирар устадвилелди хуралай кIелунин ва адан манияр лугьунин конкурсар кьиле физва.
Мадни, гьар са классди шаирдиз талукьарнавай вичин газет акъудзава. Мектебди «Лап хъсандиз кIелин» тIвар алай газетдин цIийи нумра акъуднава. «Намус» кьил гана акъудзавай стенддиз аквадай чка ганва. Ана шаирдин биография, муаллим Ж. Мирзоевади теснифнавай «Заз багьа я Сулейман» шиир, СтIал Сулейман чидайбур тир М. Горькийди, В. Луговскойди, П. Павленкоди вичин тIвар уьлкведилай къецени машгьур хьанвай бажарагълу шаирдин яратмишунрикай лагьанвай фикирар, адаз ганвай къиметни къейдзава.
Лезги чIаланни литературадин муаллим Мирзеферов Къазанфара 8 «а» классдин аялрихъ галаз санал «ХХ-асирдин Гомер» тIвар гана гуьрчег ва еке фотомонтаж гьазурнава. Шикилрай шаирдин саки вири уьмуьр аквазва.
«СтIал Сулейманан 140 йисан юбилей» лишандик кваз саналди тир вечер тухуда. Аниз шаирриз, журналистриз, чкадин телевидениедиз теклифда.
Юбилейдиз гьазурвилер акун давам жезва. И карда классрин руководителар тир Ф. Гьажиевади, З. Абдулазизовади, Х. Мустафаевади, Г. Бутаевади, Къ. Мирзеферова, библиотекарь Л. Уружбеговади, ва масабуру активвал къалурзава.
Вири серенжемар мектебдин тарихда культурадин кьилдин са чин яз гьатда.
