Алим хьун регьят я, итим хьун четин, - лугьузва бубайрин камаллу мисалда. И мисал зи рикIел мукьвара Кьасумхуьрел бине кутуна яшамиш жезвай векьеларви Агъаханов Жалалдин Агъахановичахъ галаз гуьруьшмиш хьайила хтана.
- ЧIехи дережайрин къуллугъдал кIвалахдай мумкинвилер захъ хьанач, чан хва, - милаимдиз лагьана заз яшарихъ галаз камаллувилин гьуьндуьр дережадиз хкаж хьанвай Жалалдин Агъахановича. – Амма итимвилин ягь-намус за вири уьмуьрда хвена, жувалай алакьдайвал хуьр-кIвал, общество патал кар-кIвалах авуна. Им, хтул, за жувалай тариф ийизвайдай кьамир вуна. Зун жуван бейнида гьахьтин майилар аваз вердиш хьайиди я.
За чина берекатдин, камаллувилин нур авай агъсакъалдин ихтилатрихъ дикъетдивди яб акалзава. Гьакъикъатдани, фикирзава за, Жалалдин Агъаханович хьтин инсанар уьмуьрда фейи ва физвай рехъ гьар са несил патал чешне я.
Инсанар ва кьисметар – жуьреба-жуьре я абур. Жалалдин Агъахановичан аял ва жаван вахтар регьятбур хьана лугьуз жедач.
- Заз, чан хва, зи буба акурди туш, - лугьузва яшар 91 йисалай алатнавай агъсакъалди. – Зун гьеле дуьньядиз къведалди, дидедин руфуна амаз, буба рагьметдиз фена. – Диде Ханагъади чаз – ирид веледдиз – бубавални авуна, дидевални, чун кIвачел акьалдарна.
А. Агъахановичахъ галаз авур суьгьбетдай малум хьайивал, ада Векьелрал 7-класс акьалтIарна, хуьруьн «Яру партизан» колхозда кIвалахиз башламишна. Зигьин, кьатIунар авай жегьил колхоздин правленидин къарардалди комсомолрин бригададин бригадирвиле тайинарна.
- Жуван хайи хуьр я лагьана Векьелрилай за тарифзавайди туш, - лугьузва Ж. Агъаханова, - гьа йисара чи хуьр мулкарал, техилар цазвай никIерал, хуьзвай мал-къарадал гьалтайла районда девлет авай хуьрерикай сад тир. Жемятдини кIвалахдай.
1939-йисуз Ж. Агъахановаз армиядин жергейриз эвер гана. 659-полкунин 155-артиллериядин стрелковый дивизиядин составда аваз ада финрихъ галаз кьиле фейи женгерин гьерекатра иштиракна. Къизгъин женгерикай сада залан хер хьайи Ж. Агъаханов 1941-йисан 7-мартдиз СССР-дин НКО-дин приказдалди, инвалид яз гьисабна, кIвализ ахъай хъувуна.
Ислягь зегьметдив эгечI хъувур Жалалдин Агъаханова 1944-йисалай 1972-йисалди Векьелрин «Яру партизан» колхозда бригадирвиле, МТФ-дин зеведишвиле, ветеринарный духтурвиле, колхоздин председателвиле кIвалахна.
1972-йисуз Жалалдин Агъаханович вичин хзанни галаз Кьасумхуьрел куьч хьана, ана бине кутуна.
Зегьметда лигим хьанвай, вичин бейнида патав гвай касдиз куьмек гуз гьазур Жалалдин Агъахановича «Самурский» совхозда мал-къара тIебии тушир къайдада тумламишунин рекьяй духтурвиле, пенсиядиз экъечIайдалай гуьгъуьниз 1981-1986-йисара Кьасумхуьруьн консервиярдай заводда охранадин къуллугъда кIвалахна.
- Ваз вуч аватIа чидани, чан хва, - лугьузва А. Агъаханова. – Заз уьмуьрда четинвилериз дурум гуз, лугьудайвал хъутIалрай экъечIиз, веледар тербияламишиз зи уьмуьрдин юлдаш Савадата куьмек гайидини къейд ийиз кIанзава. Ада саки 40 йисуз производствода зегьмет чIугуна.
А. Агъаханова чаз лагьайвал, адахъ вирида гьуьрметзавай, чешне къачуниз лайихлу тир хзанни ава. Адан веледар тир Фергьяда Кьасумхуьруьн 2-нумрадин юкьван школада завучвиле, Агъахана Украинадин Донецк шегьерда са комбинатдин директорвиле, Музлифата Тюменда духтурвиле, Ламуната Кьасумхуьрел алишверишдин хиле, Хатунагъади Хив райондин ЦIинитIрин хуьре малдарвиле кIвалахзава, Саядпери пенсияда ава, вичин хзандихъ галаз Махачкъалада яшамиш жезва.
Жалалдин Агъахановичан уьмуьрдин ва зегьметдин рехъ гьихьтинди хьанатIа, адан хурудал алай «Ватандин ЧIехи дяведин 2-дережадин орденди», «Ватандин ЧIехи дяведин фронтовик», «СССР-дин Яракьлу къуватрин 70 йис», «Яргъал йисара баркаллу зегьметдай», Ватандин ЧIехи дяведин 50, 60 йисарин юбилейрин медалри ачухдиз шагьидвал ийизва.
Уьмуьрда баркаллу рехъ фейи, и рехъ давамарзавай, гъвечIид-чIехид чидай, низам-ахлакь авай веледар тербияламишай Жалалдин Агъахановичахъ гьар са карда, хзанда бахтлувал хьун чи мурад я.
