И йикъара райадминистрацияда СтIал Сулейманан 140 йисан юбилейдин мярекатар кьиле тухун патал тешкилнавай оргкомитетдин нубатдин заседание кьиле фена. Ам и комитетдин председатель, муниципальный райондин Кьил Яралиев Имам Музамудиновича ачухна ва кьиле тухвана.
Ада и важиблу месэладиз гьазурвилер аквазвай гьалдин гьакъиндай и комитетдин членривай – гьар са жавабдар къуллугъдин руководителривай ва векилривай – хабар кьадалди сифте и мярекат кьиле тухудай йикъан ва гьакIни чкадин гьакъиндай месэла гьялна. Анал и жигьетдай, гьа вилик йисара хьиз, СтIал Сулейманан 140 йисан юбилейдин чIехи мярекат I8-майдиз Агъа СтIалдал шаирдин КIвал-музейдин вилик кьиле тухунин меслятдал атана.
Анал чIехи шаирдин юбилейдин вилик, махсус пландин бинедаллаз, кьиле тухузвай серенжемрикай, музейдал, райцентрдал алай Сулейманан паркуна ремонтрин кIвалахар кьиле физвай гьаларикай куьруь информация гваз райадминистрациядин кьилин заместитель – оргкомитетдин председателдин заместитель Гьажиагьмедов Гьажиагьмед Мегьамедович рахана.
Заседанидал чпи кьиле тухузвай кIвалахрикай ва гьакIни фикирдиз къачунвай месэлайрикай куьруь гьахъ-гьисабар ва теклифар гваз комитетдин членар тир Адуселим Абдулмежидов, Агъа СтIалрин хуьруьн муниципальный тешкилатдин администрациядин кьилин заместитель Энвер Мирзебегов, РУО-дин начальник Жабраил Асланов, Сулейманан КIвал-музейдин илимдин къуллугъчи Фейзудин Мамедов ва маса юлдашар рахана.
Абурун рахунрай малум хьайивал, алай вахтунда музейдал устIарри эцигунрин кIвалахар акьалтIарна, анин гьаяятда плиткаяр твазва, гьа са вахтунда хъувуна кIанзавай хейлин кIвалахарни ама. Райцентрдал алай СтIал Сулейманан гуьмбет авай паркуна чил туькIуьрна, цIийи къелемар акIурна, анаг элкъуьрна кIевнавай чахчахар мал-къарадивай, аялривай акатай чкадилай физ тежедайвал хкажна, туькIуьрзава. Школайра шаирдин эсерар хуралай чирунин ва устадвилелди кIелунин рекьяй конкурсар тухузва. Чкадин газетдин гьар нумрада «СтIал Сулейманан 140 йис» рубрикадик кваз адан уьмуьрдиз ва яратмишунриз талукьарнавай гегьенш материалар, рикIел хкунар, чи шаирри адаз бахшнавай шиирар, хуьрерин школайра, культурадин маканра кьиле тухузвай мярекатрикай хабар гузва, чкадин телевиденидини шаирдин юбилейдиз талукьарнавай передачаяр тешкилзава. Юбилейдиз талукьарна районда волейболдай ва азаддаказ кьуршахар кьунай турнирар кьиле тухуда.
Эхирдай анал И. М. Яралиев рахана. Ада вичин рахунра СтIал Сулейманан юбилейдиз гьазурвилер акунин еришар йигинарна кIанзавайди, адан эсерар хуралай чируниз, абур райиж авуниз, и жигьетдай тафаватлу хьайибур руьгьдин жигьетдай ашкъиламишдай серенжемар кардик кутуниз кьетIен фикир гун лазим тирди ва и жигьетдай махсус къарар акъуддайдини лагьана. – Чи руьгьдин девлет, чи дамах тир СтIал Сулейманан шиирар гьар са школьникдиз, муаллимриз ва маса подразделенийрин къуллугъчийризни хуралай чир хьун герек я, - къейдна И. М. Яралиева. Ада вичин рахунра чIехи шаирдин суьрет-баральеф алай стелла Ростов-Баку шегьре рекьелай (Советское хуьр алай чкадилай) чи райондиз къвезвай къекъуьндал эцигдайди, са бязи хуьрера куьчеяр зирзибилдикай михьунин, къаналар, дигидай яд физвай хуьлер къайдадик кутунин кIвалахар хъсан тешкиллувал аваз кьиле физватIани, гзаф чкайра и важиблу месэладиз бес кьадар фикир тагузвайди ва и карда аквадай дегишвал тун чарасуз тирди лагьана.
Заседанидал гьакI шаирдин юбилейдиз гьазурвилер акунин жигьетдай хъувуна кIанзавай са жерге маса месэлайризни килигна, гьар са къуллугъдин вилик талукь везифаяр эцигна, абур кьилиз акъуддай вахтар тайинарна.