Ваъ, заз къе вичикай газетдиз макъала кхьизвай Бабаев Тельман Мегьамедзагьидович мукьувай таниш туш. Амма завай инанмишвилелди лугьуз жеда, адахъ бажарагъ ава, гележегда агалкьунарни жеда. Таниш тушир касдикай макъала гьикI кхьизва?, - хабар кьун мумкин я газет кIелзавай гьар сада.
И йикъара заз, фадлай чидай, гзаф гьуьрметлу кас, чи районда гзаф йисара гьар жуьре жавабдар къуллугъар авур ва алай вахтундани райондин хуьруьн майишатдин управленидиз регьбервал гузвай Бабаев Мегьамедзагьид Мегьамедсадикьович гьалтайла, жузун-качузун авурла малум хьайивал, адан гада Тельмана ДГУ-дин юридический факультетда лап хъсан къиметар, преподавателрин ва студентрин арада чIехи гьуьрмет аваз кIелзава.
Бабаев Тельман Мегьамедзагьидович 1988-йисуз чи райондин Герейханован совхоздин 2-отделенида дидедиз хьана. Гьа ина школада кIелна. Чешнелу ученикрикай сад яз, адан шикил Гьуьрметдин доскада хьана. Вири предметар лап регьятдаказ чириз алакьзавай Тельмана райондин, республикадин олимпиадайра 1-чкаяр кьуна. 2005-йисуз школа агалкьунар аваз акьалтIарай ам гьа и йисуз ДГУ-дин юридический факультетдин студент хьана. Алай вахтунда ада 4-курсуна лап хъсан, кьетIен агалкьунар аваз кIелзава, анин общественный уьмуьрда активвилелди иштиракзава.
Мадни са кар къейд ийиз кIанзава. Дерин кьатIунар, хъсан чирвилер авай студент тир Тельмана республикада ва уьлкведа тухузвай илимдинни теориядин конференцийра, конкурсра иштиракзава, анра кIвенкIвечи чкаяр кьазва. Ингье, зи вилик «Лап хъсан илимдин кIвалах»» конкурсда иштирак авунай ва гъалибвал къазанмишунай, «15 лет Конституции Российской Федерации: проблемы теории и практики» темадай республикадин ВУЗ-рин уртах илимдинни тежрибадин конференцияда иштирак авунай ва гъалиб хьунай ДГУ-дин ректор физикадинни математикадин илимрин доктор, профессор М. Х. Рабаданован ва конференциядин тешкиллувилин комитетдин председатель, юридический факультетдин декан, юридический илимрин доктор, профессор Ш. Б. Мегьамедован къулар алай Грамотаяр ква.
Абурулай гъейри Т. Бабаева Кабардино-Балкарский Республикада кьиле тухвай Вирироссиядин студентрин XIII-лагьай илимдинни теориядин «Современная преступность: состояние, проблемы, перспективы противодействия» конференцияда иштиракна. Гьанани ада гъалибвал къазанмишна ва Кабардино-Балкарский Республикада авай МВД-дин ЭКЦ-дин начальник, милициядин полковник Х. И. Жашуеван къул алай Грамота гваз хтана.
Истемишунардай, чеб чешне яз къалуриз алакьдай диде-бубайрин веледриз хъсандиз кIелун, низамлувал, гьуьрметлувал адетдин кар хьиз аквада. Тельманан диде-бубади аялрик инсанвилин, чирвилерал рикI хьунин, патав гвай касдиз гьуьрмет авунин ерияр кутуна. Гьавиляй Тельман вичихъ галаз кIелзавай вири юлдашрихъ галаз хатурлу, гьуьрметлу хьун дуьшуьшдин кар туш.
И йикъара Тельманан диде-бубадин тIварцIихъ чухсагъулдин чар хтанва. Ана икI кхьенва:
«Гьуьрметлу Мегьамедзагьид Мегьамедсадикьович ва Рая Сеферовна.
ДГУ-дин юридический факультетдин ректоратдиз ва деканатдиз квез а кардин гьакъиндай хабар гуз кIанзава хьи, куь хва Тельман кIелунин ва гьакIни ахлакьдин рекьяй амайбуруз чешне я. Ада илимдинни ахтармишунрин кIвалахра ва общественный уьмуьрда активвилелди иштиракзава, юриспруденциядин рекьяй хъсан пешекар хьун патал чарасуз тир дерин чирвилер ва тежриба къачун патал алахъзава. Адаз профессорско-преподавательский коллективдин ва гьакIни факультетдин, университетдин студентрин патай еке гьуьрмет ава.
Тельманаз ихьтин хъсан тербия гунай чна квез чухсагъул лугьузва.
Университетдин ректор, профессор Рабаданов М. Х.
Юридический факультетдин декан, профессор Мегьамедов Ш. Б.
Тельманан гъвечIи стха Эльманани райондин олимпиадайра галаз-галаз кьве йисуз информатикадай 1-чкаяр кьуна. Алай вахтунда Дагъустандин медакадемияда лечебный факультетдин 2-курсуна кIелзава.
Алай девирдин гзаф студентрикай, абурун чирвилерикай, жегьилрикай гьар жуьре рахазва. Гьа са вахтунда, зегьмет чIугуна, дерин чирвилер къачуз алахънавайбурни авачиз туш. Ингье, Тельманни гьабурун жергедай я. Баркалла вичиз. Чи жегьил несилди гележегда гьар са кеспида чпин бажарагълувал, агалкьунар къалурдайдахъ чун кIевелай инанмиш я.
Алакьунар, дерин чирвилер авай лезги хва Бабаев Тельманаз жаван яшда къазанмишнавай агалкьунар тебрик авуналди ва аферин лугьуналди, чаз адахъ мадни чIехи дережадин агалкьунар хьана кIанзава.
