ТIебиатдин шартIариз килигайла, чи районда экономика, хуьруьн майишат вилик тухудай вири жуьредин мумкинвилер ава. Са 20-25 йисан идалай вилик район багъманчивиляй, уьзуьмчивиляй, магьсулдарвиляй, майвачивиляй ва хуьруьн майишатдин маса хилерай республикада вилик жергейра авайбурукай сад тир.
Районда хуьруьн майишатдиз инад кьур, хъсан бегьерар гузвай багъларни уьзуьмлухар терг, техника вара-зара авур йисар алатна фена. Гила, аквазвайвал, районда хуьруьн майишат вилик тухун, гьасилзавай продукциядин кьадар артухарун патал виликди камар къачуз башламишнава. Алатай йисуз районда багъманчийри, саларбанри, малдарри 616 миллион манатдин къимет авай суьрсет гьасилуни идан патахъай ачухдиз шагьидвал ийизва.
Хуьруьн майишат вилик тухун – им, гьелбетда, техникадилайни гзаф аслу жезва. Гьайиф хьи, майишатрин, карханайрин, лежбервилинни фермервилин майишатрин техникадин 90 процент лап фадлай ишлемишзавайбур ва куьгьне хьанвайбур я. И кар фикирда кьуна, «Рычал-су» завод ОАО-дин ва «Россельхозбанкдин» куьмекдалди, районда «Кюре-Агро» тIвар алаз машинринни тракторрин станция кардик кутунва.
Алай йисан бегьер патал шазан зулухъай райондин карханайри, КФХ-ри, ЛПХ-ри 2000 гектардилай виниз майданра техилар цанва. Гзаф майданра техилар цанвай карханайрик «Куркент» МУП (200 га), «Юхаристальский» МУСП (200 га), «Ашагастальский» ЗАО (165 га), «Даркуш» ОАО (110 га), «ЦIийи рехъ» СПК (82 га) акатзава.
Районда цIийи уьзуьмлухар ва багълар кутазвай карханайрин, иллаки кьилдин ксарин – арендаторрин кьадарни къвердавай артух жезва.
И рекьяй «Зардиян» ООО-да ва «Аламишинский» ГУП-да тухузвай кIвалах иллаки тариф авуниз лайихлу я. Абурукай гьар сада эхиримжи йисара 100 гектардилай виниз майданра цIийи уьзуьмлухар кутуна.
Мукьвара зун «Зардиян» карханадиз фена. Ана кIвалах тешкилнавай гьал акурла, зи гуьгьуьл шад хьана. Уьзуьмлухра чешне къачуз жедай къайда, михьивал ава. ЦIийиз кутунвай чубукар хкатунар авачиз экъечIнава, абурун тан дуьз атун патал, гьар садан пунахъ ракьун тIвалар акIурнава, уьзуьмлухра столбаяр акIурнава, симер чIугунва, жергейрин араяр цанва, тегьенгрин пунариз пер янава.
Лагьана кIанда хьи, уьзуьмлухра акIурзавай ракьунни бетондин столбаярни карханади чкадал гьазурзава. Абурухъ яцIувал ава, кIевивилизни мягькем я – аквазва, ина гьазурнавай столбайрин кьадардиз ваъ, еридиз фикир ганва.
Карханадихъ вичин «ДТ-75», «МТЗ-82» маркайрин тракторар, машинарни ава. Ида уьзуьмлухра агротехникадин серенжемар чпин къуватралди ва галай-галайвал кьиле тухудай мумкинвал гузва.
Мад са кар къейд ийиз кIанзава. И карханади бегьердал атанвай уьзуьмлухрин гьар са гектардай 65 центнер ципицIар кIватI хъувуна.
Санлай къачурла, карханада 60 касдив агакьна рабочийри ва механизаторри зегьмет чIугвазва. Абурукай гьар сада вацра 5-6 агъзур манат пул къачузва.
Эхь, районда хъсандиз кIвалахзавай карханаяр, КФХ-яр, ЛПХ-яр, арендаторар тIимил авач. Гуьгъуьна амай, хуьруьн майишатдин продукция гьасил тийизвай, агъуз тир нетижаяр жезвай карханайри, кьилдин ксарини хъсанбурулай, вилик жергейра авайбурулай чешне къачун лазим я.