Вичин сифтегьан уьмуьрдин юлдаш Марият кечмиш хьайила СтIал Сулейманан нафакьада 5 аял амукьна. Шаир патал четин вахт алукьна. Диде амачир етим 5 аял галай кесиб Сулейманаз вуж гъуьлуьз къведай кьван? Вичин уьмуьрдин юлдаш кьейидалай гуьгъуьниз адаз гъуьлуьз атай Айнади ихьтин суьгьбет авунай:
«Заз Сулейманакай гьеле гъуьлуьз къведалди ван хьанай. Зун адан кьвед лагьай паб я. Зун адаз гъуьлуьз атайла ам акьалтIай кесибвиле авай. КIвалерин кьвед лагьай мертеба чна санал хкаж хъувурди я. Акьван чIавалди чаз лап дар тир. ЧIехи рухваяр кIвалахдиз къабилбур жез эгечIна. Им тахминан 15-16 йис идалай вилик тир. Мусаиб гьеле лап гъвечIизмай. За ам лап жуван гъвечIи велед хьиз тербияламишна. Ирид йис вилик (пуд йиса аваз) зи хва кьена. Ам Сулейманаз гзаф кIандай. «Им зи кьуьзуь Айнадин хва я!» - лугьудай ада.
Сулейманаз вичин, гьакI масадбурун аялар гзаф кIандай. Ам инсанрихъ галаз гзаф хушвилелди рахадай. Ада аялриз, къал акъуд тийиз, ислягьвилелди яшамиш жез чирнай. Зун Сулейманаз гъуьлуьз фейидалай кьулухъ заз ада масадан тIварцIиз векъи гаф лагьана лугьуз ван хьайиди туш.
Сулеймана Баку, Дербент шегьеррикай гзаф суьгьбетар ийидай, амма абур квекай тиртIа зи рикIел аламач. Зи рикIелай вири фад алатдай, Сулейман гьамиша и кардал хъуьрез жедай. Зи рикIелай накь вуч тIуьнатIа алатдай. Заз чизвай Сулейманан сагъламвал зайиф хьанвайди. Эхиримжи вахтара адан кьил тIа жезавай ва адавай виликдай хьиз вичин кIвалах ийиз жезвачир. Инсанри адаз мад са цIуд йисар хганайтIа лугьуз тIалабдай, амма заз ам са кьве йисуз кьванни амукьнайтIа кIандай. Заз Мусаиб гзаф кIандай ва адаз зунни. Ам хъфейла зун дарих жедай. Сулейманан гьакъиндай лагьайтIа, ада мукьвал-мукьвал комсомолриз вичин патав эвердай ва абуруз чпи-чеб гьикI тухудатIа меслятар къалурдай. Вичиз хъсан яшайиш тешкилайлани адаз адакай менфят къачуз чидачир.
Заз ва гьакIни хуьруьнвийриз чизва адаз уьмуьрда гьикьван четинвилер акунатIа, ва адаз цIийи бахтлу уьмуьр тIимил акуна лугьуз гьайиф чIугвазва, заз ам са кьве йисуз кьванни амукьнайтIа кIандай. Вирибуруз Сулейман чида ва играми я, и кIвалах за гьисзава ва и кардай за абуруз чухсагъул лугьузва. Ам пакамахъ фад къарагъдай. За адаз лугьудай: «Кьуьзек, вуна вучиз икьван тIимил ял язава?» Ада лугьудай: «Пакама алукьдайла заз кьарай къведач. Зун шиирар теснифиз фин лазим я». Ада манияр гзафни гзаф пакамахъай туькIуьрдай. Ада колхозникриз салар кутунин карда куьмекар гудай, гзаф вахтара шиирар кIвалахдай вахтунда теснифдай ва абур инсанриз ял ядай вахтунда кIелдай. Виликдай колхозар жедайди, бязибуру адаз лугьудай: «Ви чIаларикай вуч менфят ава?», амма ада абуруз яб гудачир. Колхозар жедалди са тIимилбур варлудаказ, чIехи пай кесибвиле аваз яшамиш жезвай. Бязибурухъ гзаф чилер авай, Сулейман хьтинбурухъ са затIни авачир. Алай вахтунда виридахъ вири ава: зун мукьвал-мукьвал колхозникрихъ галаз гуьруьшмиш жезва, абуру колхоздин девлетрал шадвалзава, абурухъ галаз санал зани. Алай йис колхоз патал шадлуди я.
Вири колхозникриз ам кIандай, са бязибуруз колхоздиз къвез кIанзавачир. Амма колхоз мягькем хьайила Сулейманаз ихьтин тешпигьдин затI акурди тушиз, я ван хьайиди тушир. (Мусаиб чахъ галаз яшамиш жезвай). Ада чаз Сулейманакай вичин биографический поэма кIелдай. Ам ада вичи теснифайди я, чна адаз са жерге делилар ганай. Сулеймана вичин аялриз тербия гудай. Абуру хъсандаказ кIелун патал алахъдай. Абурукай сад школадай фад хтайла Сулеймана лугьудай: «КIелуна сабурлу хьана кIанда!»
Гзафбур адан патав меслятар къачуз къведай. Адавай Москвадикай хабарар кьадай. Колхозникрин Собранийрал ада вичиз акур гьаларикай гегьеншдаказ суьгьбетардай ва вичин цIийи шиирар кIелдай. Заз Сулейманавай Горькийдин гьакъиндай гзаф ихтилатрин ван хьана. Сулеймана чаз вичи Сталинахъ галаз гьикI ихтилатар авунайтIа, и цлал алай шикил (са шикилдай янавай Сулейманан портрет) къалуриз, ингье гьа икI (гьа ина авайди хьиз) «Зун Сталинахъ галаз рахана» - лугьудай. Заз Сулейман Верховный Советдин сессиядалди амукьнайтIа гьикьван кIандай. Ам кандидат яз хкягъайла за адавай, вун зайиф хьанва, вун Москвадиз гьикI фида лагьана хабар кьурла, ада лугьудай: «Эгер зун тухун тавуртIа, зун аниз яхдиз фида! Им са касдин кар туш, им халкьдин кар я. Мусаиба заз куьмекда!» Амма Сулейман азарлу хьана ва 1937-йисан 23-ноябрдиз регьметдиз фена.