Гьавади сувариз кьецI гудач
Дагъустандин гидрометцентрди хабар гузвайвал, апрелдин вацран эхиримжи гьафтеда арадал атанвай рагъ алай чими гьава майдин вацран сифтегьан цIуд юкъузни амукьда. Яни гьавадин шартIари Гъалибвилин сувар вири халкьарин иштираквал алаз кьиле тухуниз кьецI гудач. Анжах гьуьлуьн къерехрив гвай ва дуьзенлух районра гарар акъатда ва абурун йигинвал къвез- къвез зайиф жеда. Майдин сифте йикъара гьава къана амукьда ва дагълух районра куьлуь марфарни къун мумкин я. Амма абуру санлай кьурла суварин гуьгьуьлар чIурдач.
Суварин йикъара саки виринра гьавадин чимивили 15- 20 градус тешкилда, дагълух районра ам 20-22 градусдихъ агакьда.
Юкьван гьисабдалди кьуртIа, майдин вацран чимивили 16-17 градус тешкилда. Бязи йикъара гьавадин чимивал 25-30 градусдихъ кьван агакьда, дагълух районра ада 22-27 градус тешкилда.
Юкьван гьисабдалди къвалрин кьадар и вацра нормадилай са тIимил артух жеда ва абуру 20-60 миллиметр, дагълух районра 60-100 миллиметр тешкилда. Къвалар вацран сифтегьан паюна жеда.
ВацIариз къати селлер атунин къурхуллувал авач, дагълара авай живерни яваш-явашдиз цIрада.
Санлай кьурла майдин варз хуьруьн майишатдин ва маса кIвалахар тухун патални къулайди жеда.