Абидин Камилов
Алудмир куь рикIелай
Чи Ватандал чIулав тир циф атайла,
Ам чкуриз, къати гар хьиз, фейибур,
Виш касдикай къад кас хуьруьз хтайла,
Куь рикIел хуьх чун патал чан гайибур.
Мехъерарна, дем такуна фейибур,
Гьахъ, намус хуьз, дяведин цIа кайибур,
Фашизмдин концлагерра хьайибур,
Минет я зи: алудмир куь рикIелай.
Умуд, даях - авай са хва кьейибур,
Маса чилел сурар кьисмет хьайибур,
Гел галачиз и дуьньядлай фейибур,
Минет я зи: алудмир куь рикIелай.
Чанар гана, чи азадвал хвейибур,
Дагъустандай Берлиндиз кьван фейибур,
Тамарзлу тир чи Гъалибвал гъайибур,
Минет я зи: алудмир куь рикIелай.
Гур дяведин шагьидар яз амайбур,
Фашизмдиз вичин чка къалайбур-
Ветеранар - баркаллад зар алайбур –
Минет я зи: алудмир куь рикIелай!
Зумрият Жабраилова
Къурбан буба
(Ватандин ЧIехи дяведин иштиракчи Къурбанов Къурбанан 100 йисан юбилейдиз бахшзава)
Дяведикай хвейи яман,
Чи шегьерар, хуьрни уба,
Къе хьанва куь виш йис тамам,
ЦIелегуьнви Къурбан буба,
Дуьз вад йисуз чIугуна женг,
Гъиле аваз турни тфенг,
Туна вуна душман йикье,
Пак гъалибвал аваз рикIе.
Багьад хьанай а гъалибвал,
Ветеран, куьн хьтинбуруз,
Гьазур я чун, кьил агъузна,
Икрам ийиз йифиз-юкъуз.
Хайи эллер хуьн паталди,
Акъатнай куьн Берлиндиз кьван.
Миллионралд(и) чанар гана,
Хвенай жуван Диде Ватан.
А хьайи кьван азиятар
Кьегьалди хьиз эхна вуна.
Чаз гъалибвал гъана багьа,
Гележег чи бахтлу хьана.
Мубаракрай къе виш йис Квез,
КIани кьадар хьуй мад йисар.
Кьегьалрилай, а куьн хьтин,
Несил патал ама тарсар.
Къурбан буба, ваз веледар,
Сагъ саламат яз акурай.
Куьн кIубан яз гьаб(у)рун кьилел,
Ислягьвал хьуй дуьньяд винел.
Багьаудин Къурдулов
Ислягьвал хуьх, инсанар!
Гьикьван иер аквазва
Къе бубуяр авай ник!
Гьар са цуьк я тазазвай
Ашкъи-гьевес авай рикI.
Ашукь хьана чилел и
Сархуш хьайи чIимчIирар.
Галукьзава чинихъ зи
Шагь дагъдилай атай гар.
Припев:
Гуьлчименда цуьквер хьиз,
Куь уьмуьрда бахт хьурай!
Веледрин шад бегьерни
Муьгьуьббатдин тахт хьурай!
Ислягьвал хуьх, инсанар,
Гьамиша куь вилер хьиз,
Текъведайвал гьижранар
Куь балайрин рикIериз.
Зирек хьайи куьрпейрал
Дамахдайвал дидейри,
Минет я квез, минет я-
Рехъ гумира дявейриз!
Къази-Агьмед
Ислягьвилин сес
(Ватандин ЧIехи дяведин женгерай хтун тавур зи имияр – Меликни Алибег Къазиагьмедовар рикIел хкун яз)
Зи яшинда акунач заз
А инсафсуз дяве залан.
Гуьллейрин хар акьунач за,
Хьаначир заз тупарин ван.
ЦIаяр-гумар алахьзавай
Акунач заз хайи чилер,
Хирер иви авахьзавай,
ХарапIаяр хьайи кIвалер,
Ажалдин цIу кайи накьвар...
Акунач заз гъамлу вилер,
Авахьзавай туькьуьл накъвар...
Амма завай кьуртIа хабар,
Гьарайда: хьухь уях, эллер!
Са мурад гваз хкаж гъилер-
Дяве-къиргъин – хъижен тийин
Ислягь зегьмет алай чилер
Жегьеннемдиз элкъуьр тийин!
Кутазвайбур дяведин цIай,
Терг хьурай куь ният кьацIай!
РикIел хкваш вахтар фейи.
Азаб чIугур эл-беледар-
Инсанар квез лянет гайи...
Алат чалай! Регьят жеда
Чилин шардал нефес чIугваз.
БapбатIзавай шегьерни хуьр,
Тергиз алахънавай уьмуьр
Дяве кIандач санани чаз!
Михьи гьава, михьи гьава!
ЦIун гумари тавур чиркин
Вили цава, вили цава,
Бомба ават тийир, секин,
Оливадин хел кIуфаваз
Лув це вуна, зи лацу лиф.
Хушбахтвилин шадвилер гваз,
Гьар са кIвализ хьухь вун илиф.