Гьуьрметлу районэгьлияр!
Вири уьлкведин миллионралди инсанри хьиз, чи райондин агьалийрини 9-майдиз кьетIен гъалаба кваз, рикIера еке дамах ва гьа са вахтунда арадал хкиз тежер хейлин магьрумвилери гайи туькьуьлвал аваз чун патал виридалайни ишигълу ва багьа сувар - Ватандин ЧIехи дяведа Гъалиб хьунин Югъ, Ватандин аслу туширвал патал чи халкьди авур эбеди кьегьалвилерин зурбавал къалурзавай Югъ къейдзава.
64 йисан идалай вилик, 1945-йисан майдиз, чи Ватандин тарихда виридалайни жанлу ва бедбахтвилин чинрикай сад акьал хьана. Гъалибвилихъ финин рехъ яргъалди давам хьана. Фашизмдиз акси яз кьуд йисуз кьиле фейи дяведи гьар са хзандиз, гьар са агьалидиз курвилер гъана, абур багърийрикай, мукьва-кьилийрикай магьрумна. И дяведи гзафбурун кьисметар маса патахъ элкъуьрна. Амма гъалиб¬вилихъ финин рехъ инсандин къуватар ва руьгь а чIавалди такур тегьерда хкаждайдини хьана.
И суварин юкъуз чна кьил рехи хьанвай ветеранриз мад сеферда гьуьрмет ийизва, чи Ватандин азадвал ва аслу туширвал патал чпин чанар къурбанд авур ксарин экуь къаматар, кьил агъузна икрам авуналди, рикIел хкизва, далу патан зегьметчийриз чухсагъул лугьузва.
За Ватандин ЧIехи дяведин ва зегьметдин фронтдин ветеранриз, чи райондин вири агьалийриз ЧIехи Гъалибвилин Югъ рикIин сидкьидай мубаракзава. Заз квехъ чандин сагъвал, руьгьдин мягькемвал, бахтар, ислягьвал ва генгвал хьана кIанзава.
«Сулейман Стальский район» муниципальный тешкилатдин Кьил И. ЯРАЛИЕВ.
