• Ихьтин дуьдгъвер хъсандиз къайи цяй чуьхвена, адакай тIунутIар хьтинбур ийида. Ахпа таза некIедик са шумуд сятда тада. Гуьгъуьнлай мад хъсандиз чуькьвена, кьел яна, адакай яд хкудда;
• дуьдгъвер хуьрекдин сода кутунвай цин къаришмадалди (содадин са чайдин тIур кьве истикан циз вегьеда) 2-3 сеферда къйи целди чуьхуьда ва хъсандиз кьел яда;
• куьгьне дуьдгъвер цIурур хъийиз жеда. Къаайи яд илична, хуьрекдин содадин са тIур алава хъувуна, хъсандиз хкуьрда. Ахпа яд хкудна, гьар са килограмм дуьдгъвердиз са истикан нек алава хъувуна, цIурур хъийида;
• цIурур хъийидайла, дуьдгъвердиз са тике фу вегьена, адал къизилдин ранг акьалтдалди тада. И фан тикеди дуьдгъвердин чIуру ниэр вичел чIугвада.
ЦIурурнавай чIемедихъ агалтай чIуру ял, адаз са шумуд кIус газар вегьена, са шумуд юкъуз туна, галудиз жеда.
НекIедин хуьрек авай катулдин кIан кун тавун патал хуьрек яцIу кIан квай катулда зайиф цIал авун меслят къалурзава.
Лапша, макаронар, дуьгуь некIеда акьван хъсан ргадач, гьаниз килигна абурукай некIедин хуьрек ийидалди вилик абур це 3-6 декьикьада ругун теклифзава.
* * *
Эгер мукаш лап цуруди ятIа, ам барабар кьадар таза некIедик акадарна са сятина тур. Ахпа суьзекда тунвай жунадал вегьена, нек хкудур ва амукьай мукаш са залан затIунин кIаник кутур. Мукаш тазади ва ширинди хъжеда.
* * *
Мукашдик квай цурувал хкудун патал ам кьвед-пуд къат авунвай жунадик кутуна, са кIватI хьтинди авуна, жунадин кьилер алчударна, тахтадал эцигда. Ахпа винелай маса тахта эциг хъувуна, кьвед пуд сятина вине¬лай залан затI эцигна, цIвегь хкудда.
* * *
Холодильникда ниси къизилверекьдин ва я пергаментдин чарчик кутуна хвейитIа хъсан я. Адетдин чарчик кутуртIа, ам фад кьурада.
* * *
Холодильникда ниси мурк кьазвай чкадивай тIимил яргъа эцигайтIа хъсан я.
* * *
Холодильникда эцигиз кIанзавачтIа, ниси, кьелен цик кьежирна, ламу авунвай салфеткадик кутуна хуьз жеда.
* * *
Эгер ниси кьадарсуз кьуранватIа, некIедик кутуна туна хъуьтуьлариз ва таза хъийиз жеда.