Малум тирвал, алай йисан майдин вацра бязи тахсиркарвилерай тахсиркарар обществодивай къерех тавуна, яни азадвиликай магьрум тавуна, жазаламишдай къуллугъдин 90 йис тамам хьанва. И йикъара чи махсус корреспондент чи районда авай уголовно-исполнительный инспекциядин начальник къенепатан къуллугъдин капитан, Дагъустанда бандитрихъ галаз тухвай женгерин иштиракчи Гьабибов Ромик Кейбуллаевичахъ галаз гуьруьшмиш хьана ва адавай и къуллугъдикай, тухузвай кIвалахдикай куьрелди суьгьбет авун тIалабна.
Агъадихъ чна адан суьгьбет гузва.
Куьруь справка:
Гьабибов Ромик Кейбуллаевич 1980-йисуз Мегьарамдхуьруьн райондин Советское хуьре дидедиз хьана. 2002-йисуз Юстициядин Министерстводин правадин ва управленидин Рязандин Академия акьалтIарна. Мегьарамдхуьруьн РОВД-дин кадрайрин отделдин инспекторвиле кIвалахна. 2006-йисалай С. Стальский райондин уголовно-исполнительный инспекциядин начальник я.
Алай йисуз тахсиркар яз гьисабзавайди обществодивай къерех тавуна жазаламишдай уголовно-исполнительный инспекциядин 90-йис тамам жезва. Инкъилабдилай виликан девирда тахсиркарар жазаламишунин доктрина жазаламишунин жигьетдай Уставда тайинарнавай уголовный правадин классический школадал бинеламиш хьанвай.
1917-йисан Октябрдин революциядилай гуьгъуьниз Советрин гьукум Россиядин уголовный правадин системада бинеламиш хьанвай карательный серенжемрикай къерех хьана ва пролетарский уголовный политика яратмишунив эгечIна. Азадвиликай магьрум тавуна жазаламишунин уголовный кьилдинди тир жуьре юстициядин Халкьдин Комиссариатдин инструкциядин бинедаллаз 1917-йисан 19-декабрдиз кардик акатна ва адаз «мажбури общественный кIвалахар» ва я «принудительный кIвалахар» авун лугьуз хьана.
1933-йисалай мажбури кIвалахриз «исправительно-трудовые работы», 1958-йисалай «исправительные работы» лугьуз хьана.
1997-йисан 1-январдилай туькIуьр хъувунин кIвалахрин ва кIвалахдал таъминарунин инспекциядикай уголовно-исполнительный инспекция (УИИ) хьана ва 1999-йисуз ам Россиядин МВД-дин ихтиярдай Россиядин Минюстдив вахкана.
Чи С. Стальский райондин инспекциядин учетда 95 кас ава. Абурукай чIехи пай юкьван заланвилин тахсиркарвилер авунай, азадвиликай магьрум тавуна, шартIунин жаза ганвайбур я.
Чахъ жазаламишзавайбурун ихьтин категорияр ава:
1) шартIунин жаза ганвайбур;
2) туькIуьр хъувунин кIвалахрин жаза ганвайбур;
3) жаза кьилиз акъудуникай вахтуналди акъвазарунин жаза ганвайбур;
4) яшар тамам тахьанвайбуруз шартIунин жаза ганвайбур;
5) мажбури кIвалахрин жаза ганвайбур;
6) алай къуллугъдал кIвалахун къадагъа авунин жаза ганвайбур.
Ихьтин жазаламишзавайбурун жергедик гзаф дуьшуьшра вичин к1вачихъ шей гьасилдай чил галаз ва я доход къведай маса рекьер аваз, зегьметдин биржадик экеч1на гьукуматдивайни пул къачузвайбур ва маса категориядин инсанар акатзава. Чи учетда ахьтинбурни са кьадар ава. И жигьетдай гьар садаз законрин истемишунар чир хьун ва абурал амал авун герек я.
Чна чи кIвалахда кьилин фикир гьар себебралди тахсиркарвал авурбур дуьз рекьел хкуниз тагькимаруниз ва профилактикадин серенжемриз гузва. И карда чаз хуьрерин муниципальный тешкилатри, агъсакъалрин Советри ва маса общественный тешкилатри, санлай вири общественностдини куьмек гун важиблу я.
Суьгьбетдай чухсагъул. Квез къуллугъ арадал атайдалай инихъ 90 йис тамам хьун мубаракрай. Квехъ куь хивевай жавабдар к1валахда агалкьунар хьурай.
- Квезни чухсагъул.