И йикъара Кьасумхуьрел, «Сулейман-Стальский район» муниципальный тешкилатдин администрациядин заседанийрин залда, зональный семинар- совещание кьиле фена. Адан кIвалахда Дагъустан Республикадин юстициядин министр Азади Тагьирович Рагьимова, и министерстводин жавабдар работникри, хуьрерин поселенийрин кьилери, гьакIни Сулейман-Стальский, Агъул, Ахцегь, Докъузпара, Кьурагь, Хив, Дербент районрин ЗАГС- рин отделдин зеведишри, теклифнавай маса юлдашри иштиракна.
Атанвай мугьманар тебрик авуналди, семинар- совещание «Сулейман-Стальский район» муниципальный райондин Кьил Имам Музамудинович Яралиева ачухна ва гаф ДР- дин юстициядин министр Азади Тагьирович Рагьимоваз гана. Министрди семинар- совещание тухунин макьсаддикай ва анал алай месэлайрикай лагьана.
Гуьгъуьнилай анал ДР-дин юстициядин министерстводин ЗАГС-дин управленидин начальник Жамиля Абидиновна Алиевади «ЗАГС- дин органрин вилик акъвазнавай везифайрин ва Федеральный законри и рекьяй ийизвай истемишунрин гьакъиндай», и министерстводин регистрациядин отделдин начальник Мухтар Динисламович Пашаева «Муниципальный нормативный правовой актарин регистрациядин гьакъиндай», Дербентдин нотариальный округдин нотариус Ханумагъа Алипашаевна Айдунбеговади «Федеральный законрихъ галаз кьадайвал нотариальный къуллугъдин вилик акъвазнавай везифайрин гьакъиндай» темайрай метлеблу докладар авуна.
Абуру семинар- совещанидин иштиракчийрин патай хьайи суалриз жавабарни гана.
Гьялзавай месэлайрин важиблувал къейд авуналди ва абуруз баянар гуналди, семинар-совещанидин нетижаяр Азади Тагьирович Рагьимова кьуна.
Эхирдай мугьман хьунай, метлеблу семинар-совещание тухунай Имам Музамудинович Яралиева ДР- дин юстициядин министр Азади Тагьирович Рагьимоваз, атанвай амай мугьманриз чухсагъул лагьана.
