29- июндиз Сулейман- Стальский муниципальный райондин депутатрин Собранидин кьуд лагьай сеферда эвер ганвай 13- сессия кьиле фена. Адан кIвалахда хуьрерин поселенийрин кьилери, райадминистрациядин управленийрин ва отделрин, гьакIни са жерге идарайрин ва организацийрин руководителри, Собранидин депутатри иштиракна.
Сессиядал агъадихъ галай месэлайриз килигна:
1. 2008- йисуз «Сулейман- Стальский район» муниципальный райондин бюджет кьилиз акъудай гьалдин гьакъиндай.
2. 2009- йисан 9- февралдиз 79- нумрадик кваз депутатрин Собраниди кьабулай «2009- йисуз ва 20I0- 2011- пландин девирда «Сулейман- Стальский район» муниципальный райондин бюджетдин гьакъиндай» къарардик дегишвилер ва алаваяр кухтунин гьакъиндай.
3. «Сулейман- Стальский район» муниципальный райондин администрациядин къурулушда дегишвилер тунин гьакъиндай.
4. Жуьреба- жуьре месэлаяр.
Сессия, алай месэлайрикай лугьуналди ва абурун важиблувал къейд авуналди, райондин депутатрин Собранидин Председатель Имам Музамудинович Яралиева ачухна ва кьиле тухвана. Ада къейд авурвал, 2008- йис патал муниципальный райондин бюджет депутатрин Собранидин къарардалди 2008- йисан 18- январдиз кьабулнай. Бюджетдин классификациядин статьяяр дегиш хьунихъ ва республикадин бюджетдай пулунин алава такьатар атунихъ, бюджет тамамарунин рекьяй бюджетдин такьатар къачузвайбурун арада къайда тунихъ галаз алакъалу яз бюджет тамамаруник са жерге дегишвилер кухтунва. Идахъ галаз сад хьиз, бюджетдин къазанжияр 32,4 процентдин, расходар 30,65 процентдин артух хьана.
Гьа икI, 2008- йисуз райондин бюджет тамамарунихъ рекье тунвай серенжемар кьилиз акъудунин рекьерай чкадин самоуправленидин органри Россиядин Федерациядин ва Дагъустан Республикадин законодательствайри чпин хиве тунвай везифаяр тамамарна.
Сессиядал алай сад лагьай месэладай анал финансовый управленидин руководителдин заместитель Ярагьмедов Балабег Мирзоевича доклад авуна.
И месэладай сессиядал алава доклад депутатрин Собранидин бюджетдин, финансрин ва налогрин рекьяй гьамишалугъ комиссиядин председателдин заместитель Абумуслимов Къазиагьмед Ярагьмедовича авуна.
Бюджет туькIуьр хьунин ва бюджетдин кIвалах тухунин положенидихъ галаз кьадайвал бюджет тамамарунин гьакъиндай гьахъ- гьисабдиз килигдайла ва кьабулдайла муниципальный райондин гуьзчивалдай органдин заключение герек жезвайди фикирда кьуна, сессиядал гаф муниципальный райондин контрольно- счетный палатадин председатель Эскеров Къехлер Къазиагьмедовичаз гана.
Заседанидал 2008- йисан бюджет тамамарун тестикьарна.
Имам Музамудинович Яралиева лагьайвал, алай йисан 9- февралдиз, депутатрин Собранидин 10-сессиядал, 2009- йис патал муниципальный райондин бюджет кьабулнай. Бюджет туькIуьр хьунин ва бюджетдин кIвалах тухунин положенидихъ галаз кьадайвал, бюджет тамамарзавай вахтунда муниципальный райондин администрациядин представленидалди депутатрин Собраниди дегишвилер кухтазва.
Бюджетдик кухтазвай дегишвилерин гьакъиндай сессиядал финансовый управленидин руководителдин заместитель Ярагьмедов Балабег Мирзоевича информация авуна.
И месэладай сессиядал, вирида сад хьиз сесер гуналди, къарар кьабулна.
Гуьгъуьнлай анал «Муниципальный райондин администрациядин къурулушда дегишвилер тунин гьакъиндай» месэладиз килигна.
И месэладай куьруь гаф рахай Имам Музамудинович Яралиева къейд авурвал, «Россиядин Федерацияда чкадин самоуправление тешкилунин умуми къайдайрин гьакъиндай» Федеральный закондихъ, муниципальный райондин Уставдихъ галаз кьадайвал ва Дагъустан Республикадин «Дагъустан Республикада муниципальный къуллугърин реестрдин ва муниципальный къуллугърин тIварарин гьакъиндай» закондихъ галаз кьадайвал ва администрациядин къурулуш вилик тухунин мураддалди муниципальный райондин администрациядин къурулушда дегишвилер тунин лазимвал ава.
И месэладай сессиядал муниципальный райондин администрациядин крар идара ийизвайди тир Наджафов Мирземет Карибовича информация авуна.
И месэладайни анал къарар кьабулна.
Сессиядал «СтIал Сулейманаз памятник эцигун патал заказчик тайинарунин гьакъиндай» ва «ИНЕКО» компанидив гайи финансовый куьмек вахкунин вахт артухарунин гьакъиндай» месэлайризни килигна.
Анал Имам Музамудиновича къейд авурвал, алай йис ХХ асирдин Гомер, Дагъустандин халкьдин шаир СтIал Сулейманан йис яз малумарнава. Районда шаирдин 140 йисан юбилейдиз талукьарнавай мярекатар хъсан тешкиллувал аваз кьиле тухвана. Абур халкьдин рикIера яргъалди амукьда. Районда СтIал Сулейманан йис давамарун яз мад са баркаллу кар гъиле кьунва- «Кавказ» федеральный шегьредилай райондиз къвезвай къекъуьндал памятник эцигда.
Сессиядал И. М. Яралиева СтIал Сулейманан 140 йисан юбилейдиз талукьарна лап хъсан мярекат тухунай Зизикрин юкьван школадин коллективдиз (директор М.А.Мегьамедова), районда тухвай мярекатра активвилелди иштирак авунай Кьулан СтIалрин юкьван школада кардик квай рушарин кьуьлерин «Стимул» ансамблдиз ва шаирдин юбилейдиз талукьарна шикилрин галерея тешкилунай фотожурналист Т.М.Мегьамедоваз чухсагъулар малумарна, абурув Чухсагъулдин чарар вахкана.
Сессиядал жуьреба- жуьре маса месэлайризни килигна.
