Зизикрин хуьруьн юкьван школада кIелзавай аялриз чирвилер ва тербия гунин жигьетдай кIвалах вахтунин истемишунриз жаваб гудайвал эцигуниз къвердавай артух фикир гузва.
Мектебда вишни яхцIур аялди кIелзава. Абуруз чирвилер гунал 26 муаллим машгъул я. Абурукай цIипудахъ кьилин образование ава. Амайбур юкьван махсус образование, гзаф йисарин тежриба авай муаллимар я.
Алатай йисуз школа лап хъсан къиметралди ругуд аялди акьалтIарнатIа, алай йисуз цIуругуд аялди куьтягьзава. Школа куьтягьай гзаф аялри кьилин образование къачуз вузра кIелзава.
Школадин директор хьайи куьруь са вахтунда Мегьамедова Манията школадин куьгьне классар ремонт авуна, методикадин кабинетар кардик кутунва, санлай школадин педколлективдин кIвалахда дегишвал тунва.
Школа тIебии газдалди таъминарнава. Сифтегьан классра кIелзавай аялриз чими тIуьнар гузва. Мектебдин сергьят къацу тарари ва цуьквери безетмишнава. Школадин гьаятдиз булах хканва. Ина бегьерлувилелди кIвалахдай вири къулай шартIар яратмишнава. И кардилай муаллимри ва кIелзавай аялри еке разивал ийизва.
И мукьвара школадин директор Мегьамедова Маният образованидин работникрин профсоюздин обкомдин Гьуьрметдин грамотадиз лайихлу хьана.