КIахцугърин хуьруьн юкьван сa мертебадин школадин дарамат хуьруьн кьилихъ гала. Лагьана кIанда хьи и школадин муаллимрин арада ва школадин дараматдихъ галай багъдани эхиримжи вахтара хъсан патахъди гзаф дегишвилер хьанва. Школадин директорвиле Эскеров Мавлудин Къазимегьамедович ва организаторвилени Бабаев Беглерхан Рамазанович тайинарна са акьван вахт туштIани абур школадин дараматдин къене ва школадихъ галай бахчадани гзаф дегишвилер тваз агакьнава. Кьилди къачуртIа школадин бахчада авай тарар вири кьурана са затIни амачиз баябанвилиз элкъвенвай. И карди сифтени сифте школадин директор Эскеров Мавлудинан рикIик гзаф къалабулух кутазвай. Школадин педсоветдал алай месэлаяр гьялна куьтягьайла, анал ада школадин бахчада цIийиз багъ кутунин месэлани къарагъарна. И месэладал школадин муаллимар вири рази хьана. Бахчада дуьз лагьайтIа инал-анал сур хьанвай сад-кьве тарар амазмай. Бахчадин гзаф чкада цIийиз къелемар кутадай фурар атIана гьазурнавай. - И фурара, башламишна вичин ихтилат Малашериф Мегьамедшерифовича, чна цIийиз къелемар кутада. Вири атIанвай кьван фурар чна зегьметдин тарсара аялар галаз ва муаллимрин куьмекдалди атIанвайди я. Къелемриз атIанвай фурар гьисабайла пудкъадалай виниз хьана. Ихтилатдин арада за адаз са суал гана. АтIанвай кьван фурариз акьван къелемар гьинай атурарай квез? Суалдиз сад лагьана жавабни жагъана. Малашериф Магомедшерифовича кутадай къелемар алай чкани къалурна. Къелемар муаллимрин такьатралди къачунвайбур я. Гьелбетда бахча кутурла аниз ахъайна гудай ядни кIанда. РикIиз кIан хьайила вири жедайди я, - лагьана муаллимди. Яд чна бахчадин кьилихъ галай булахдай бедрейралди гуда. Чи школьникрин рикIни и кIвалахдал ала. Кьвед лагьай сеферда жуван ватандиз хъфей зун гьикI ятIанани жува сифте кIелай школадин дарамат галай патахъ фена. Гьелбетда, зун школадин бахчадизни фена. Ана заз цIийиз акIурнавай жуьреба-жуьре емишрин къелемар акуна. Маса кас инанмиш жедач, кьвед лагьай сефердани зун сифте суьгьбет авур Малашериф муаллимдал гьалт хъувуна. Ада ихтилат мад бахчадилай башламиш хъувуна. Муаллимди заз къелемар акIурдайла гьи аялди гзаф куьмек ганатIа ва муаллимрин коллективди гьикI зегьмет чугунатIа ихтилатар авуна. Алай девирда гьелбетда им тIимил кIвалах туш. Гзаф кIвалахар виликни кума-лугьузва Малашериф муаллимди. Гьа кIвалахарни вири муаллимрин коллективни галаз ва школада кIелзавай аялрин куьмекдалди санал арадай акъудда.
Квехъ куьн кIвалахда мадни зурба агалкьунар хьурай, гьуьрметлу КIахцугърин юкьван школадин кIелзавайбурни муаллимар!
сагърай кахцугърин муаллимар