Виликдай Эминхуьре хуьруьн майишатдин кIвенкIвечи карханайрикай сад тир «Аламишинский» совхоз кардик квай, ана гьар йисуз 3500 тонндилай виниз ципицIар гьасилзавай. Къе совхоз амач. Хуьре уьзуьмчивал вилик тухунал инвесторди тешкилнавай «ЧIереяр» ООО, «Алахвердиев» КФХ ва арендаторар машгъул жезва.
И йикъара чун арендаторрин кIвачихъ галай са шумуд участокдиз фена, анра агротехникадин серенжемар кьиле тухузвай гьалдихъ галаз таниш хьана. Гьамзатов Самурханан, Агъамирзоева Эльмирадин, Мегьамедов Миламудинан, Ферзилаев Намрудинан участокриз фейила чаз акурвал, анра тегьенгрин кьурай ва герек авачир хилер атIана, жергейрин араяр цана акьалтIарнава, и йикъара арендаторар тегьенгрин пунариз пер ягъунал машгъул я.
«Алахвердиев» КФХ-дани уьзуьмлухра агротехникадин серенжемар галай-галайвал ва еридивди кьилиз акъудзава. Адан кIвачихъ 5 гектар бегьердал атанвай ва 3 гектар жегьил уьзуьмлухар гала. Алатай йисуз КФХ-ди бегьердал атанвай уьзуьмлухрин гьар са гектардай 180 центнер ципицIар кIватI хъувуна. Им республикада хъсан нетижайрикай сад я.
Мукьвара лежбервилинни фермервилин и майишатда уьзуьмлухра гатфарин кIвалахар тухунив эгечIда.
Хазран Кьасумов.