«Сулейман-Стальский район» муниципалитетди эхиримжи йисара экономика мягькемарунин, хуьруьн майишат вилик тухунин, гьасилзавай продукциядин кьадар артухарунин рекьерай виликди мягькем камар къачузва, агалкьунар къазанмишзава. И кIвалахриз инвестиционный проектар кардик кутуни гузвай куьмек иллаки екеди я. Инвесторри са шумуд кархана тешкилнава, кIвалахзава.
Мукьвара районда инвестиционный мад са чIехи проект уьмуьрдиз кечирмишиз эгечIда: 20 гектардин майдандал теплицайрин комплекс эцигда. Ана йисан кьиляй-кьилиз салан майваяр гьасилда. Проектдин къиметди 500 миллион манат тешкилзава. Ам кардик акатайла 200 касдиз кIвалахдин алава чкаяр жеда.
Муниципальный райондин Кьил Нариман Шамсудинович Абдулмуталибова лагьайвал, проект кардик кутунихъ район социально-экономический рекьерай вилик фин патал еке метлеб ава. Алава кIвалахдин чкаяр хьунилай гъейри, агьалияр экологиядин жигьетдай михьи тир помидорралди, афнийралди, истивутралди ва маса майвайралди таъминарда.
Проектдин инвесторар Москвада кIвалахзавай чи райондин агьалияр я.
Теплицайрин майишатрикай рахадайла, ихьтин са карни къейд ийиз кIанзава: и хел районда вилик физ са шумуд йис я, ада вичин менфятлувал тестикьарнава. Алай вахтунда районда теплицайрин 10 майишат кардик ква, санлай къачурла, абуру 7,14 гектардин майдан кьунва.
2015-йисуз ДаркIуш къазмайрин хуьруьн поселенидин территориядал кьве майишатда цIийи теплицаяр эцигна: «Гюлгери-вацI» ООО-да 0,24 гектарда ва «Даркуш» ООО-да 0,8 гектарда. «Гюлгери-вацI» ООО-да мад 0,6 гектарда теплица эциг хъийида, гележегда абурун майданар мадни артухарда.
Герейханован хуьре кардик квай «Казиахмедов К. А.» КФХ-дин теплицайрин комплексни йисандавай-суз чIехи жезва. Ина агротехникадин алай аямдин кIвенкIвечи къайдаяр ишлемишзава. Ина гьасилзавай салан майвайрихъ райондилай къецени муьштерийрин патай еке игьтияж ава.
2014-йисуз дагъдин Векьелрин хуьре Абдуразакь Абдуразакьова кутур теплицайрин комплексдани (0,50 га) хъсан еридин помидорар, афнияр, хивецIар гьасилзава.
Продукция гьасилзавай теплицаяр «Ахмедов Я. М.» КФХ-дихъ (ЦIийи Макьар), «Аминов» ИП-дихъ (Кьасумхуьр), ЦIийи Макьарилай тир карчи Я. Агьмедовахъни ава.
Мадни, «Оруджев Н. С.» КФХ-дихъ Кьасумхуьрел 2 гектарда, са инвестордихъ Вини СтIалрин хуьре 5 гектарда цIийи теплицаяр эцигдай проектар ава.
Винидихъ гъайи мисалрай аквазвайвал, районда теплицайра салан майваяр гьасилунин, цIийи теплицаяр кутунин кIвалахар вилик физва. Инвестиционный проектар кардик кутазвайбуруз райондин руководстводи ва хуьруьн майишатдин отделдин пешекарри вири рекьерай куьмекни гузва.
Хазран Кьасумов.