Виридуьньядин дидед чIаларин лишанлу йикъан суварин вилик И. Гь. Тагьирован тIварунихъ галай медениятдин Дворецда райондин мектебрин муаллимрин манийринни кьуьлерин нубатдин кьвед лагьай фестиваль кьиле фена.
Санлай къачурла, и мярекатда 22 мектебдай алакьунар авай муаллимри иштиракна. Абуру халкьдин манияр, кьуьлер тамамарунай, гъвечIи сегьнеяр тешкилунай, шиирар кIелунай алакьунар къалурун лазим тир.
РУО-дин ИМЦ-дин методист Мегьамедова Назирата фестивалдин иштиракчияр, тамашзавайбур мярекатдин истемишунрин гъавурдик кутуна. Мярекат Эминхуьруьн мектебдин муаллимри «Магьидилбер» мани тамамарунилай башламиш хьана. Ахпа сад-садан гуьгъуьналлаз сегьнедиз амай коллективарни экъечIна ва гьарда вичи гьазурнавай программайрай лезги халкьдин виликан ва гилан аямдин манияр тамамарна, чи бубайри виликдай мехъеррик, мелера ийиз хьайи кьуьлерни устадвилелди тамамарна.
Сифтегьан номинациядилай гуьгъуьниз гъвечIи сегьнеяр гьазурнавайбуру ва ахпани шиирар хуралай кIелдайбуру чпин алакьунар къалурна. Анал малум хьайивал, винидихъ къейднавай жуьрейрай алакьунар авай муаллимар чи мектебра гзаф ава, чпин алакьунар абуру и мярекатдал ачухдаказ къалурна. Ахьтинбурун арадай А. Гьажиев, Н. Агъаева, Г. Мирзоева, Ф. Алибегова, Б. Исмаилов, С. Къачаева, М. Шерифов, Ш. Вагьабова, Н. Халифаева, М. Ризаев, Р. Керимова ва масабур къалуриз жеда.
Мярекатдин эхирдай нетижаяр кьуна. Малум хьайивал, манийрай 1-чка Герейханован, Кьулан СтIалрин, Эминхуьруьн, 2-чка АгъастIал къазмайрин, Герейханован 2-нумрадин, 3-чкани Кьасумхуьруьн 1-нумрадин, кьуьлерай 1-чка Кьулан СтIалрин, Кьасумхуьруьн 1-нумрадин, 2-чка ЦIийи Макьарин, 3-чка Герейханован 2-нумрадин, сценадай 1-чка Кьулан СтIалрин, Шихидхуьруьн, 2-чка Курхуьруьн 1-нумрадин, 3-чкани ДаркIушрин, шиирар кIелунай 1-чка Герейханован 1-нумрадин, АгъастIал къазмайрин, Кьулан СтIалрин, Шихидхуьруьн, ДаркIушрин, Кьасумхуьруьн 1-нумрадин, 2-чка ЦIийи Макьарин, Сийидрин, 3-чкани Курхуьруьн 1-нумрадин, Эминхуьруьн юкьван мектебрин коллективри кьуна. Абур вири, талукь тирвал, РУО-дин Гьуьрметдин грамотайриз лайихлу хьана.
Фестивалдин кIвалах РУО-дин ИМЦ-дин методист Мегьамедова Назират кьиле аваз, амай къуллугъчийри, М. Милагьимов кьиле авай пешекаррин жюриди хъсан тешкилна ва кьиле тухвана. Тамашачийризни и мярекат бегенмиш хьана. Гележегда ам гьар йисуз тухудайвал я.
Райсудин Набиев, чи штатдик квачир корр.