21-февралдиз муниципальный райондин Кьил Абдулмуталибов Нариман Шамсудиновичан кабинетда районда дидед чIалан конференция кьиле тухунин жигьетдай тешкилнавай оргкомитетдин нубатдин заседание кьиле фена.
Анал и жигьетдай алатай заседанидал гайи тапшуругъар кьилиз акъудзавай гьалдикай ва вилик кумай гьял хъувуна кIанзавай кIвалахрикай куьруь информацияр гваз РУО-дин начальник Индира Османова, райондин культурадин отделдин начальник Майрудин Бабаханов рахана.
ЧIалан конференция хъсан тешкиллувал аваз кьиле тухун, ам метлеблуди ва маракьлуди авун патал чпин фикирар ва теклифар гваз анал и комитетдин членар тир «Куьредин ярар» культурадин макандин комитетдин председатель Агьмедпаша Агьмедпашаев, Шихидхуьруьн юкьван школадин лезги чIалан муаллим, писатель Нажмудин Шихнабиев, райондин информациядин агентстводин регьбер Жабраил Асланов ва маса юлдашар рахана.
Абурун рахунрай малум хьайивал, гьар себебралди, алай йисуз конференция РДК-дин тамашачийрин чIехи залда 29-февралдиз йикъан сятдин 12-даз кьиле тухуда. Адан кьилин тема ихьтинди я: «Пути сохранения и развития родного языка в современных условиях в свете изучения лезгинского героического эпоса «Шарвили».
Ана чи райондин образованидин ва культурадин идарайрин руководителри, пешекарри, школайрин чIалан муаллимри, чIехи классрин аялри, гьар жуьре конкурсрин ва предметрин олимпиадайрин гъалибчийри, общественный тешкилатрин, СМИ-рин векилри, къунши районрай ва шегьеррай гзаф кьадар мугьманри, хайи дидед чIалахъ кIевелай рикI кузвай алимри, муаллимри, яратмишунардай интеллигенциядин, искусстводин векилри иштиракда.
Конференциядилай гуьгъуьниз (пакад юкъуз) лезги чIалан ва литературадин секцийри чпин кIвалах давамарда.
Эхирдай анал рахай муниципальный райондин Кьил Нариман Шамсудинович Абдулмуталибова конференциядал яргъалди тир рахунар тавун (ахьтин докладар СМИ-рин такьатрай гун), аялрин чпин иштираквал артухарун, инициатива хкажун, тафаватлу хьайибур (гьам аялар, гьамни муаллимар) материальный ва руьгьдин жигьетдай ашкъиламишдай серенжемрикай менфят къачун герек тирди, гьар са кас вичел ихтибарнавай кардив жавабдарвал гьисс авуналди эгечIун важиблу тирди къейдна, гьар къуллугъдиз талукь тир тапшуругъар гана.
Гьа иналди тешкиллувилин заседаниди вичин кIвалах акьалтIарна.
А. Камилов.
Шикилра: заседание кьиле физвай вахт.