23-февралдиз – Ватан хуьзвайбурун юкъуз – Кьиблепатан территориальный округда Дагъустан Республикадин Кьилин патай тамам ихтиярар авай векил Али Султанович Хасбулатов ва «Сулейман-Стальский район» муниципальный райондин Кьил Нариман Шамсудинович Абдулмуталибов Агъа СтIалрин хуьре яшамиш жезвай Ватандин ЧIехи дяведин иштиракчи, гзаф кьадар орденринни медалрин сагьиб, гвардиядин майор Гьажимегьамед Къазимегьамедован патав фена. Абурухъ «сельсовет Ашагастальский» хуьруьн поселенидин кьил Низами Абдурагьманов, райондин информационный агентстводин руководитель Жабраил Асланов, массовый информациядин такьатрин векилар галай.
Али Султанович Хасбулатова дяведин ветеран Гьажимегьамед Къазимегьамедоваз Ватан хуьзвайбурун югъ Дагъустан Республикадин Кьил Рамазан Абдулатипован ва вичин патай мубаракна, ЧIехи Гъалибвал къачуник пай кутунай, акьалтзавай несил ватанпересвилин руьгьдаллаз тербияламишунай адаз чухсагъул лагьана ва ДР-дин Кьилин патай тебрикдин чар вахкана.
- Гьуьрметлу ветеранар, Ватандиз вафалу хьунин, викIегьвал къалурунин рекьерай куьн чаз, къвезмай несилдиз, чешне я, - лагьана вичин рахунрин эхирдай Али Султанович Хасбулатова. – Чна квелди дамахзава.
Гвардиядин майор Гьажимегьамед Къазимегьамедова ветеранриз виниз тир дережада фикир ва куьмек гунай Дагъустан Республикадин руководстводиз, кьилди Рамазан Гьажимурадович Абдулатиповаз рикIин сидкьидай чухсагъул лагьана, вичин женгинин рекьикай суьгьбетна, фронтда хьайи хейлин вакъиаяр рикIел хкана.
- Жуван патайни заз Ватан хуьзвайбурун югъ Рамазан Гьажимурадович Абдулатиповаз, Али Султанович Хасбулатоваз ва Нариман Шамсудинович Абдулмуталибоваз мубарак ийиз кIанзава, - лагьана Гь. Къазимегьамедова. – Зи мурад дуьньяда ислягьвал, хушбахтлувал хьун я.
Муниципальный райондин Кьил Нариман Шамсудинович Абдулмуталибовани дяведин ва зегьметдин ветерандиз тебрикдин хуш келимаяр гзаф лагьана.
- Ветеранрин игитвал са чIавузни рикIелай алатдач, ам акьалтзавай несил патал Ватандиз вафалу хьунин карда чешне яз амукьда, - къейдна Н. Ш. Абдулмуталибова. – ЧIехи несилдиз, иллаки Ватандин ЧIехи дяведин ветеранриз, чун буржлу я, гьикI лагьайтIа, абуру Ватан душмандикай хвена, чаз ислягьвал, азадвал гана, инсаният фашистрин тIегъуьндикай азадна. Къе, гьуьрметлу ветеран, за Квез Ватан хуьзвайбурун югъ райондин Собранидин депутатрин, администрациядин ва кьилди жуван патай рикIин сидкьидай мубаракзава. Квехъ мягькем сагъламвал, бахтлувал, чи зурба Ватанда ислягьвал, секинвал, абадвал хьана кIанзава заз.
Гуьруьш метлеблуди, рикIел аламукьдайди хьана.
Хазран Кьасумов.
Шикилда: гуьруьшдилай гуьгъуьниз.