Шаирринни арифдаррин ватан яз гьисабзавай чи райондин алимрин жерге мад са цIийи тIварцIелди артух хьана: алатай йисан 23-декабрдиз чи районэгьли, вичин бине Кьулан-СтIалдилай тир Рамалданов Гьажибала Измаиловича Москвада М. В. Ломоносован тIварунихъ галай МГУ-да «Ценности и предстваления в структуре политического менталитета жителей Республики Дагестан» темадай политический илимрин кандидатвилин алимвилин дережа къачун патал диссертация агалкьунралди хвена.
Адан илимдин руководитель тарихдин илимрин кандидат, доцент Евгеньева Татьяна Васильевнади, официальный оппонентар тир философиядин илимрин доктор, «Национальный исследовательский университет «Высшая школа экономики» ВПО-дин ФГАОУ-дин доцент, социальный илимрин факультетдин политический илимрин департаментдин профессор Малинова Ольга Юрьевнади ва политический илимрин кандидат Усманова Заира Рамановнади еке къимет гана.
Измаилан хва Рамалданов Гьажибала 1989-йисан 23-мартдиз Кьулан СтIалдал дидедиз хьана.
2006-йисуз хайи хуьруьн юкьван школа акьалтIарай жегьил гада ДГУ-дин социальный факультетдик кIелиз экечIна ва 2011-йисуз анаг лап хъсан къиметар аваз куьтягьна. Вичин халу муаллим Абдусамедов Анвар Шихрасуловичан теклифдалди илим чирунихъ къаних жегьил пешекар М. В. Ломоносован тIварунихъ галай МГУ-дин политологиядин факультетдин социологиядин ва политикадин психологиядин кафедрада аспирантурадик кIелиз экечIна.
Анаг Гьажибала Рамалданова политический илимрин кандидатвилин дережа къачун патал диссертация кхьиналди акьалтIарна, илимдин рекьяй вичин кIвалах давамарзава.
Вичи къачунвай политический илимрин кандидатвилин тIвар мубарак авунихъ галаз санал чаз чи жегьил алимдихъ уьмуьрда ва илимдин рекье еке агалкьунар хьана кIанзава.
Асият Мусаева, газетдин культурадин отделдин заведующий.