Къадим Къавкъаздин бинелу халкьарикай сад тир лезгийрихъ вичин тарихда гьар девирра хайи къул, ватандин аслу туширвал хуьн патал, чпин чанарни гьайиф татана, халис лезгидиз хас тирвал, дагъдин лекьер хьиз, женгиниз экъечIай ва чпин тIварар эбеди авур зурба полководецар, генералар, офицерар, прапорщикар, сержантар ва жергедин аскерар тIимил хьанач. Ахьтинбур чахъ алай вахтундани ава. Кьилди къачуртIа, тек са чи райондай акъатнавай кьван генералар, умудзава, са бязи гъвечIи уьлквейрихъни авач. Абур чи халкьдин дамахар, чи руьгьдин даяхар я.
Къенин и макъалада заз ихтилат, чи генералрикай ваъ, хайи Ватандиз къуллугъ авур са тIимил йисара вичелай амайбуруз чешне къалурай, гьайиф хьи, цавун тагъдай цIуьтхуьнай гъед хьиз, чи арадай фад акъатай, вичин бине Кьулан СтIалдилай тир полициядин прапорщик регьметлу Латифов Байрамбег Абдулфетягьовичакай ийиз кIанзава. Алай йисан 21-февралдиз ам чи арадай акъатайдалай инихъ 2 йис тамам жезва.
Адакай са гъвечIи макъала кхьин ва а газет хьайитIани вичиз аманат яз хуьз тун патал завай и йикъара чи редакциядиз атай Байрамбеган диде Латифова Ансията тIалабна. Чагъиндавай хва – виридалайни багьа кас – фад къакъатунин хажалатдикди ясдин либас алай а дишегьлидин – дидедин суьретдин ва руьгьдин зарулвал акурла за адаз а кар хиве кьуна. Ада эхирдай зи вилик багьа аманатар яз хуьзвай военный парталар алай хцин шикил ва къуллугъдин вахтунда адан командирри чухсагъулар малумарнавай приказар, диде-бубадин тIварцIихъ хтанвай чухсагъулдин чарар, грамотаяр эцигна.
Абурукай са шумуд заз газет кIелзавайбурун фикирдиз гъиз кIанзава:
Хайи йикъан тебрик: «РФ-дин МВД-дин Санкт-Петербургдин ва Ленинграддин областдин Кьилин управленидин руководстводин тIварунихъай полициядин прапорщик Латифов Байрамбег Абдулфетягьовичаз вич хайи югъ мубаракзава.
РикIин ситкьидай Квехъ бахт, мягькем сагъламвал, саламатвал, хайи Ватандиз къуллугъ авунин баркаллу карда агалкьунар хьана кIанзава».
РФ-дин МВД-дин Санкт-Петербургдин ва Ленинграддин областдин ГУ-дин начальник, полициядин генерал-майор М. И. Суходольский.
Грамота: «Къуллугъдин везифаяр чешнелудаказ кьиле тухунай, Чечен Республикадин Гьукуматдин дараматрин комплекс хуьнин карда виниз тир пешекарвал къалурунай».
В. Х. Мельников, къенепатан къуллугъдин подполковник, комплексдин комендант.
Кьилди къачуртIа, Байрамбега къуллугъ авур частунин командир къенепатан къуллугъдин полковник Д. Н. Коловалован тIвар алаз адан диде-бубадин тIварцIихъ хтай чухсагъулдин чарче ихьтин гафар кхьенва:
«Гьуьрметлу Абдулфетягь Байрамбегович ва Ансият Зейнудиновна!
Куь хцин къуллугъдин вири кIвалах Ватандиз ян тагана къуллугъ авунин чешне я. Гьахъвал хуьн, вич дуьз тухун, акьуллувал, виниз тир пешекарвал адан асул ерияр я, абур себеб яз куь хциз чи вири сотрудникрин ва командиррин арада еке гьуьрмет ава. Квевай адал гьахълудаказ дамах ийиз жеда. Ихьтин хва тербияламишунай квез рикIин ситкьидай чухсагъул…»
Гьелбетда, хуьруьн юкьван школа, гуьгъуьнлай РФ-дин МВД-дин Санкт-Петербургдин институтдин Дербентда авай юридический отделение акьалтIарайла контрактниквиляй ОМОН-диз къуллугъиз фейи, адан кIвалах четинди тир, къуллугъдин везифаяр кьиле тухудайла сагъламвилиз хьайи хасаратвилер себеб яз, духтуррикайни куьмек тахьай, Байрамбег, вичин авай са аял диде-бубадал аманат яз туна, рикIе экуь мурадар амаз, 2014-йисан 21-февралдиз чи арадай акъатна.
Амма ватандин, агьалийрин хатасузвал хуьн патал чпин чанарни гьайиф татана къуллугъ авурбурун тIварар ва экуь къаматар чи рикIелай алатдач, женнет кьисмет хьурай чпиз.
Ансият дидеди вичин хцин гьакъиндай лагьай гафар – адан рикIин гьарай заз адан вичин мецелай шиир яз кхьена гуз кIанзава, белки ада ихьтин кьисметдин сагьибар хьайи маса дидейрин рикIеризни теслли гун.
Абидин Камилов
Дидедин дерт
Хайи Ватан хуьн паталди,
Къурбанд авур ширин тир чан,
Гьелекзава рикIин тIалди
Къе ви диде, зи хва масан.
Аманат яз туна велед,
Вучиз икI фад къакъатнай вун?!
Вун тир, хва, чи умуд, медед,
Дар лакьандиз аватна вун…
Къе веледдин кIалубрай вин
Суьретдихъ чун къекъвезава.
Цлаллай ви шикил акваз,
Мад вун рикIел хуьквезва.
Аманат тир а ви велед,
Хуьда чна рикI хьиз хура.
Чи дердериз хьуй ам медед,
Ви эмирдик кваз, чан худа.
