КIвалахдин жигьетдай Кьиблепатан Дагъустанда мугьманда авайла Дагъустан Республикадин Кьил Абдулатипов Рамазан Гьажимурадович чи райондин центрдал алай алишверишдин объектрал фена, анра недай-хъвадай продуктрин ассортиментрихъ ва кIвалах тешкилнавай гьалдихъ галаз таниш хьана.
ДР-дин хуьруьн майишатдин ва суьрсетдин министр Мусафенди Велимурадов, Кьиблепатан сергьятдин округда ДР-дин Кьилин патай тамам ихтиярар ганвай векил Али Хазбулатов ва чи райондин Кьил Нариман Абдулмуталибов галаз республикадин руководитель Кьасумхуьруьн базардал алишверишдин жергейриз килигна. Анал асул гьисабдалди чкадин (райондин ва Дагъустандин) продуктралди алвер ийизвайди къейдна.
Кьилди къачуртIа, малдин якIун консервияр еке игьтияж аваз къачузва, райондин Кьилин гафаралди, абур Россиядин Сад лагьай каналда «Контрольная закупка» программадани еридин жигьетдай къейдна. Дезгедал хъсан упаковкада аваз рикIелай алатзавай продукт – нехв (полба) алай. Къуьлуьн къадим са жуьре тир адахъ гзаф кьадар менфятлу ва сагъламвал мягькемардай кьетIенвилер ава. Базардин муьштерийрихъ адан жигьетдай еке игьтияж ава.
Дезгейрал гьакI чи районда гьасилзавай гзаф маса продуктар: хатрутрин мед, цур, аджика, кIвалин дуьдгъвер, къатух, шур, ниси, какаяр, келемар, ичер, цик квай уькIуь шейэр… алай. Дагъустандин Кьили абурукай вич патал келемар, нехв, ичер ва кьурурнавай ичин патар, хатрутрин мед, цур ва маса продуктар маса къачуна.
Гьа са вахтунда картуфар масанрай гъанвайбур яз хьана. Республикадин Кьили абурни чкадал битмишарун герек тирди лагьана, базарда чкадал битмишарзавай продуктар хуьдай чкаяр ва маса гудай павильонар эцигун ва талукь тир шартIар яратмишун важиблу тирди къейдна.
Рамазан Абдулатипова алверчияр налоговый къуллугъда регистрация авунватIани чирна. И жигьетдай базардин директорди къейд авурвал, налогар галай-галайвал гузвайди я, гьар йисуз базарди са миллиондилай виниз налогрин пул гузва.
Гуьгъуьнлай Рамазан Абдулатипов яшайишдин жигьетдай къуллугъдай комбинатда авай гуьрчегвилин салонрин, отельедин, мастерскойрин кIвалахдихъ галаз таниш хьана. Республикадин руководитель абурун кIвалахдилай рази яз амукьна, гьа са вахтунда аквадай агитациядин такьатрин жигьетдай са бязи меслятар къалурна.
Дагъустандин Кьил Кьиблепатан Дагъустанда чIехибурукай сад тир «МУГ» гастрономдин кIвалахдихъ галазни таниш хьана. Туьквенда дезгейрал гзаф кьадар масанрай гъанвай шейэр, кьилди къачуртIа, нек ва некIедин продуктар ала. Рамазан Абдулатипова чкадал нек гьасилун ва адан продуктар маса гун истемишна.
«Нек, ниси, шур – ибур вири чкадин, жуванбур хьун лазим я. Чи продукция патай гъизвайбурулай ужуз хьун герек я», - лагьана ада. Гьа са вахтунда республикадин Кьили гастрономда авай чкадин продукция – келемар, помидорар, афнияр, гьар юкъуз хкизвай ва гьакIни кьурай як, тортар, кьелен цик кутазвай шейэр виниз тир еридинбур тирди, гьа са вахтунда абурун ассортимент жуьреба-жуьр хьун важиблу тирди лагьана.
«Заз са райондани ихьтин зурба туьквен акунач, ана вири ава, гьа са вахтунда жуван продукция гегьеншдаказ къалурна кIанда, агьалийривай са вуч хьайитIани гьасилун тIалабна кIанда, абур маса гудай хъсан майдан квехъ ава», - лагьана республикадин Кьили эхирдай.
(Райондин сайтдай)