Урусрин машгьур шаир Николай Тихонова гьахълудаказ къейднавайвал, урусрин тарихда А. С. Пушкинан роль гьихьтинди ятIа, лезги поэзиядин тарихда Етим Эминан роль гьахьтин зурбади я. Халкьдин рикI алай шаирди девлетлу ирсни тунва. Мадни, Етим Эмина лезги халкьдиз вичин – Эминан чIални туна.
Эхиримжи вахтара малум хьайивал, Етим Эминан несилдай адан рехъ давамардайбурни хьана ва алай вахтундани ава. Абурун арада Етим Эминан птул Эсли Селимова, штулар тир Азнифат Кьасумова, Идрис Селимов (абур Эсли дидедин веледар я) ва масабурни ава. ЧIехи шаирдин хьиз, гьабурун шиирарни гуьрчегбур, инсанрин рикIериз таъсирдайбур ва чпел дикъет желбдайбур я. И карни чаз мукьвара Дербент шегьердин «Типография – М» ООО-да чапдай акъатнавай, РФ-дин писателрин Союздин член, бажарагълу шаир Сажидин Саидгьасанова тIуькIуьрнавай «Етим Эминан несилрин ирсинай» ктабдай якъин жезва.
- XIX-асир лезги медениятдин тарихда бегьерлу девир хьиз лишанлу я. ЧIехи шаирар ва алимар тир Ярагъ Мегьамед-эфендидин, Ахцегь Алидин, Мирзе Жабрайилан, Мирзе Кериман, Етим Эминан, Алкьвадар Гьасан-эфендидин, Хиналугъви Эминан, Ялахъви Рамазанан, ТIигьиржалви Эмиралидин, Эмираслан Гъанидин ва цIудралди маса шаииррин уьмуьр ва яратмишунар и девирдихъ галаз алакъалу я. Абурун арада Етим Эмина кьетIен чка кьазва, - кхьизва ктабдикай «Сифте гафуна» адан редактор, филологиядин илимрин кандидат Азиз Мирзебегова.
«Етим Эминан несилрин ирсинай» ктаб кьуд паюникай ибарат я. Сад лагьай паюна Эминхуьре яшамиш жезвай, 86 йисан яшда авай Эсли Селимовадин шиирар ва ада хзандикай кхьенвай малуматар гьатнава. Къейд ийиз кIанзава хьи, Етим Эминан чIехи рушан тIвар Мислимат тир. Адаз Сайибат тIвар алай руш хьана. Эсли Сайибатан руш я.
Эсли Селимовадин «Эминан тIвар», «Эминхуьр», «Чи Эмин буба», «КIандай», «Сайибат дидедиз», «Ахвар яни?», «Бахт кьезил я», «УстIар Гьейбатаз», «Эминхуьруьн яргъи куьче» ва маса шиирриз Етим Эминан шиирриз мукьвавал авайди аквазва. Кьилди къачуртIа, Етим Эминан птулди «Бахт кьезил я» шиирда кхьизва:
Бахт кьезил яз зун дидедиз
хьайид я,
Гьамишанда зун гъамари
кайид я.
Шукур Аллагь, Вуна заз гьакI
гайид я,
Заз са ширин цуькведин югъ
акурд туш!
Ктабдин кьвед ва пуд лагьай паяра ганвай Эсли Селимовадин руш Азнифат Кьасумовадин «Эмин бубадиз», «За халича хразва», «Эминхуьр», «Иесидиз», Къазахстандин Актау шегьерда яшамиш жезвай, карчивилел ва меценатвилел машгъул тир гада Идрис Селимован «Дидедиз», «Уста буба», «Стха Тагьираз» шиирризни чIалан везинвал, дерин мана, гакъигунар хас я. Лугьуз жеда: абуру чпин чIехи буба Етим Эминан илгьамдин булахдай яд хъванва!
«Етим Эминан несилрин ирсинай» ктабдин 4-паюна Эсли Селимовадикай РГВК-дай «Вахтар ва инсанар» передача гьазурай Исамудин Агьмедован, Къазах-стандин Актау шегьерда кардик квай «Самур» тIвар алай лезгийрин культурадин тешки-латдин кьил Гьажимегьамед Селимован, писателар тир Гьаким Къурбанан, Абдуселим Исмаи-лован, Абдулашим Гьажимура-дован макъалайриз, Азиз Мирзебегова, Сажидин Саидгьа-санова, Хазран Кьасумова, Цнал Сулеймана Етим Эминаз бахшна кхьенвай шиирриз, Етим Эминакай СтIал Сулеймана, Николай Тихонова, Эффенди Капиева, Расул Гьамзатова, Мегьамед Гьажиева, Наталья Капиевади, Уздият Далгата, Назир Агьмедова, Камил Султанова лагьай келимайризни чка кьазва.
ЦIийи ктаб офсетдин чарчел, яцIу жилдер алаз акъуднава. 98 чиникай ибарат ктабдин тираж 100 экземпляр я. Спонсорвал Идрис Селимова авуна.
Са рахунни алачиз, и ктаб Етим Эминан эсеррал, санлай эдебиятдал рикI алайбур патал хъсан савкьват хьана.
Хазран Кьасумов, Лезги писателрин Союздин член.
