Райондин хуьрер чIехи жезва, цIийи микрорайонар, куьчеяр арадал къвезва. Анра яшамиш жезвай агьалияр газдалди, эквералди, хъвадай ва дигидай целдини таъминарун лазим я. И рекьяй «Сулейман-Стальский район» муниципальный районда еке кIвалах тухузва. ИкI, алатай гьафтеда ЦIийи поселокда Дагестанская ва Переселенческая куьчейра цIийиз тухванвай линийриз (1 километрни 400 метр) газ ахъайна. Ида 60-далай виниз хзанриз газдикай менфят къачудай мумкинвал гана.
И куьчейриз газдин турбаяр тухунин, кьве чкадал махсус шкафар эцигунин кIвалахар «Газпром-межрегионгаз» ООО-дин Кьасумхуьрел кардик квай филиалдин махсус бригадади кьилиз акъудна, - лугьузва анин мастер Алисултан Алисултанова.
ЦIийи поселокда кьве куьчедихъ газ акалзавай чкадал зун райондин архитектор Герман Гьуьсейновахъ галаз гуьруьшмиш хьана. Ада чаз лагьайвал, эхиримжи вахтара Кьасумхуьрел, ЦIийи Макьарал, КIварчагъа, Герейханован хуьре цIийиз арадал атанвай са шумуд куьчедиз газдин цIийи линияр тухвана, агьалияр тIебии газдалди таъминарна, и кIвалах давамни ийизва.
- Райондин агьалияр газдалди таъминаруникай рахадайла, заз ихьтин са кардикайни лугьуз кIанзава, - давамарзава ихтилат Герман Гьуьсейнова. – Райондин хсусиятда авай газдин вири линияр 2009-йисалай «Даггазсервис» ООО-див арендада вуганва. Яни и линийриз къуллугъ авунин везифаяр гьадан хиве ава. Районда тухванвай магистральный линияр гзаф чкайрилай чIуру гьалда ава, абур дегишарунин чарасузвал арадал атанва. Мадни, чи хуьрера куьчейрин хиверилай, туьквенрин ва эцигнавай маса дараматрин патаривай газдин линияр чилик кутунвай инсанарни ава. Им законсуз кар я. Накьвадик квай турбаяр китIида, къайдадикай хкатда. Къенин девирда газдин линияр тухун регьят кар туш. Гьавиляй газдин линийрив гьар са кас къадирлувилелди эгечIун лазим я. Мадни, ихьтин чIуру кIвалахривай талукь къуллугъар, общественный тешкилатар, къайдаяр хуьдай органрин векилар, депутатарни къерех хьана акъвазна кIандач.
