25-январдиз райадминистрациядин заседанийрин залда 2015-йисуз Дагъустан Республика вилик тухунин жигьетдай «Эффективное государственное управление» кар алай проект уьмуьрдиз кечирмишунин нетижайрин гьакъиндай ва Росиядин Президент В. В. Путина 2015-йисан 3-декабрдиз РФ-дин Федеральный Собранидиз ракъурай Чарче къарагънавай асул хилер веревирд авунин жигьетдай аппаратдин совещание хьана. Ам муниципальный райондин Кьил Нариман Шамсудинович Абдулмуталибован председателвилик кваз кьиле фена.
Совещанидин кIвалахда райадминистрациядин кьилин заместителри, райадминистрациядин къурулушдин подразделенийрин начальникри ва руководителри, общественностдин, СМИ-рин векилри иштиракна.
Совещанидал алай сад лагьай месэладай анал куьруь информация гваз райадминистрациядин крар идара ийизвайди тир Рамазан Абдулазизов рахана.
Ада къейд авурвал, 2015-йисуз «Эффективное государственное управление» проектдин сергьятра аваз адан «проведение эффективной кадровой политики», «повышение квалификации муниципальных служащих», «развитие электронного правительства Республики Дагестан» хилер уьмуьрдиз кечирмишунин жигьетдай районда еке кIвалах тухвана. Кьилди къачуртIа, муниципальный къуллугъчийрин квалификация ва пешекарвилин гьазурлухвал хкажунин кIвалахдин учет тухвана, чирвилер хкажун патал хуьрерин поселенийрин векилрихъ галаз семинарар, образованидин идарайра муниципальный къуллугъчийрин иштираквални аваз ачух тарсар кьиле тухвана, МФЦ-дай государстводин ва муниципальный къуллугъар авун тешкилна.
Муниципальный къуллугъчийриз алава чирвилер гун патал ДГТУ-дихъ галаз 2015-йисуз икьрар кутIунна. Алатай йисуз чи гзаф кьадар работникри пешекарвилин рекьяй алава чирвилер къачуна. 2015-йисан эхирра «Государственное и муниципальное управление» программадай муниципальный районрин ва шегьеррин округрин кьилер, гьа жигьетдай яз чи райондин кьилни пешекарвал хкаждай курсара хьана, - къейдна Рамазан Абдулазизова.
- Муниципальный къуллугъдин ачухвал таъминарунин жигьетдай, - давамарна ада, - районда герек тир вири шартIар яратмишнава. Муниципальный райондин официальный сайтда, «Куьредин хабарар» газетда, Фейсбукдин социальный сетра, Твиттерда, Одноклассникра районда кьиле тухузвай серенжемрикай, муниципальный органрин кIвалахдикай, абуру кьабулзавай нормативный актарикай, къараррикай информацияр гузва.
Проект уьмуьрдиз кечирмишунин жигьетдай алатай 2015-йисуз гьялай месэлайрикай яз Р. Абдулазизова документар электронный къайдада агакьарун, гьакIни кандидатрин сечкийрилай виликан программаяр гьялдай общественный майданар тешкилун къейдна.
РФ-дин Президентди Федеральный Собранидиз ракъурай Чарче авай асул хилерикай совещанидал куьруь информацияр гваз «Сад тир Россия» партиядин чкадин отделенидин руководитель Баламет Ширинов ва райондин информационный агентстводин руководитель Жабраил Асланов рахана.
Совещанидал гьялай месэлайрин гьакъиндай эхирдай анал муниципальный райондин Кьил Н. Ш. Абдулмуталибов рахана, райадминистрациядин вири къурулушри кIвалах мадни гужлу ва менфятлуди авун герек тирди къейдна.
А. Камилов.