Малум тирвал, 2015-йисуз Россиядин виридалайни къадим шегьерикай сад тир Дербентдин 2000 йисан юбилей сувар хьиз шад гьалара къейдна. РФ-дин Президент В. В. Путинан Указдалди къейд авур юбилейдиз виликамаз гьазурвилер акунвай. Шегьердин тарихдин метлеб авай чкаяр, паркар, куьчеяр, гьаятар… къайдадиз хкунин, цIийикIа туькIуьр хъувунин, безетмишунин ва ихьтин маса кIвалахра къадим шегьердиз республикадин саки вири муниципалитетри чпин патай пулунин такьатралди, кIвалахар кьилиз акъудуналди еке куьмекар гана.
И карда Сулейман-Стальский район вилик жергейра хьана. Кьилди къачуртIа, районди Дербент шегьерда 345-ДСД-динни генерал Сеидован куьчеяр сад-садал гьалтзавай хивел алай, вад мертебадин 12 «б» ва 18 «б» –нумрайрин чIехи ва гегьенш кIвалерин вилик квай, яргъивал 57 метр ва гьяркьуьвални 20 метр алай гьаятда къир цана, тротуарар авуна, 100-дав агакьна къелемар цана, кьве «беседка» эцигна, са гафуналди, гьаят къулайди, гуьрчегди авуна. Гьаят аваданламишуниз 3 миллиондилай виниз пул акъатна.
Чи районди къадим шегьерда куьчеяр, паркар аваданламишунин рекьерай маса кIвалахарни тамамарна, гьакIни райондин руководстводи, агьалийри Дербентдин юбилейдин мярекатра активдаказ иштиракна.
Лагьана кIанда, вири и кIвалахар муниципальный райондин Кьил Нариман Шамсудинович Абдулмуталибова кьетIен гуьзчивилик кваз ва иштираквал аваз кьиле фена.
Дербентдин юбилейдин сергьятра ааз Лезгийрин драмтеатрдин вилик квай майдандал СтIал Сулейманаз памятникни эцигна. Шадвилин и мярекатда райондин руководстводи, яратмишдай интеллигенциядин векилрини иштиракна.
Дербентдин 2000 йисан юбилей къейд авуник еке пай кутунай мукьвара Дагъустан Республикадин Кьил Рамазан Гьажимурадович Абдулатипова «Сулейман-Стальский район» муниципальный райондин Кьил Нариман Шамсудинович Абдулмуталибоваз чухсагъул малумарзавай чар (Благодарность) рахкурна.
Тарихдин, алакъадин ва географиядин жигьетдай Дербент лезги халкьдиз, гьабурукай яз чи райондин агьалийриз мадни мукьва я. Гьавиляй къадим шегьердин юбилейдин серенжемра иштирак авунал районэгьлийри дамахзава ва уьлкведин кьиблепатан жавагьир, Каспийдал алай къеле тир Дербентдихъ, адан агьалийрихъ генгвал, вири хъсан крар хьун кIанзава.
Хазран Кьасумов.
