Герейханован хуьруьн поселение районда чIехибурукай сад я. Адак акатзавай 1 ва 2-отделенийра, ЦIийи Мамрач хуьрера 4500 касдилай виниз агьалияр яшамиш жезва. ЧIехи гьар са чкада хьиз, и поселенидин агьалийрин игьтияжарни гзаф я. Гьелбетда, хуьрера социальный, аваданламишунин рекьерай авунвай кIвалахар тIимил туш. Республикадин метлеб авай шегьре рекьин кьве патани экIя хьанвай Герейханован хуьруьн 1 ва 2-отделенияр иллаки авадан, гуьрчег яз аквазва. ЦIийи Мамрачрин хуьр арадал атана тIимил вахт я, ана гьялна кIанзавай месэлаяр гзаф я.
Поселанидин агьалийрин дерди-баладикай, хуьрера кьилиз акъудун лазим тир кIвалахрикай и йикъара кьиле фейи Герейханован хуьруьн поселенидин агьалийрин собранидал ачухдаказ рахунар хьана. Адан кIвалахда муниципальный райондин Кьил Нариман Шамсудинович Абдулмуталибова, администрациядин управленийринни отделрин, гьакIни районда кардик квай са бязи къуллугърин руководителри иштиракуни мярекатдин важиблувал мадни артухарна.
Атанвай райондин гьакимар тебрик авуналди ва эхиримжи вахтара поселенида тухванвай кIвалахрикай, агьалийрик секинсузвал кутазвай месэлайрикай лугьуналдии, мярекат хуьруьн поселенидин кьил Руслан Алдырова ачухна ва кьилени тухвана.
Собранидал хуьре гьял тавунвай месэлайрикай поселенидин Собранидин депутат Навруз Велиметов, хуьруьнвияр тир Магьмуд Магьмудов, Айдабег Межидов, Баламет Шагьмирзоев, Селимат Залбегова, Арсен Алиев, хуьруьн поселенидин Агъсакъалрин Советдин председатель Вадим Жамалдинов ва маса ксар рахана.
Райондин администрациядин экономикадин отделдин начальник Саният Вагьабовади, хуьруьн майишатдин отделдин начальник Мегьамедзагьид Бабаева, чилерин ва эменнидин управленидин начальник Рамазан Бабаева, образованидин отделдин начальник Индира Османовади, райондин центральный больницадин кьилин духтур Максим Ханбалаева, эцигунрин ва ЖКХ-дин управленидин начальник Низами Асланова чеб кьиле авай къуллугъри тухузвай кIвалахрикай, гьа рекьерай Герейханован хуьруьн поселенида авай гьаларикай, рехъ гузвай кимивилерикай малуматар гана. Гьайиф хьи, кимивилер поселенида тIимил амач. Малум хьайивал, хуьруьнвияр чилин участокар пайнавай къайдадал рази туш. Абуру лагьайвал, садбурув са шумуд гектар чил гва, садбурув са затIни. Мадни, чилин еке майданар кьунвайбуру, КФХ-яр тешкилнавайбуру чиликай менфят къачун тийиз са шумуд йисар я. Налогар гунин жигьетдайни гьалар хъсан туш. ИкI, Рамазан Бабаева ва Саният Вагьабовади лагьайвал, поселенидин чилерикай 2445 гектар хуьруьн майишатдинбурук акатзава, адакай 508 гектар арендада вуганва. Амма арендадин налог яз ганвай пулуни анжах 50 агъзур манат тешкилзава. Хуьруьн 2-отделенида саки вири чил КФХ-рив гва лагьана документар гьазурна гзаф йисар я, амма кIвалахзавайбур лап тIимил я.
Дугъри я, алатай йисуз налогар кIватIунин рекьяй поселениди планар тамамарнава. Алай йис патал поселенидин бюджет 1370 агъзур манат яз тестикьарнава. И рекьяй мумкинвилер екебур я.
Чиликай тамамвилелди менфят къачунин карда поселенидин агьалийри федеральный ва республикадин программайри-
кай, субсидийри-кай лап зайифдиз менфят къачузва.
Гьял тавунвай месэлаяр цIийиз арадал атанвай, Советский хуьруьн къаншарда, «Кавказ» федераль-ный рекьин къерехда эцигнавай ЦIийи Мамрач хуьре иллаки гзаф ава. ИкI, и хуьряй 35 аялди Советский хуьруьн юкьван школада кIелзава. ЦIийи хуьре неинки школа авач, гьакI анин агьалияр газдалди, эквералди, хъвадай целди таъмин туш. Хуьре куьчеяр къайдадик квач.
Поселенидин хуьрера бицIекар аялрин бахчайриз желб авунин, абур электронный учетда эцигунин кIвалахни рази жедай гьалда авач. Мисал яз, Герей-ханован хуьруьн 1-отделенида школадилай виликан яшдин 600 аял ава, амма абурукай электронный учетда эцигнавайди анжах 126 аял я.
Низами Асланова лагьайвал, цIийи хуьруьз газ гъун патал 14 миллион манат пул герек къвезва. Газдин линияр тухун патал проектдинни сметадин доку-ментар гьазурнава.
Хуьруьнвийри лагьайвал, хуьруьн 2-отделенида шегьре рекьин къерех тирвал (2,5 километр мензилда) тротуар тухунин лазимвал ава.
Гьялиз тахьанвай месэлайрикай собранидал рахунар гзаф хьана. Абурун нетижаяр кьун яз рахай муниципальный райондин Кьил Нариман Шамсудинович Абдулмуталибова къейд авурвал, районда социальный, агьалийрин яшайишдин шартIар хъсанарунин рекьерай еке кIвалах тухванва. ИкI, эхиримжи 5-6 йисан къене районда чIехи 10-далай виниз цIийи объектар эцигна, рекьера, куьчейра асфальт цана, хуьруьн майишатдин ва промышлен-ностдин цIийи карханаяр кардик акатна. Хъувуна кIанзавай кIвалахар, гьялна кIанзавай месэлаярни тIимил амач. Гзаф месэлаяр ЦIийи Мамрач хуьруьз талукь я. Райондин талукь къуллугъри абур кьилиз акъудун патал серенжемар кьабулзава.
- Умудлу я, къуватар сад авуналди чавай вилик акъвазнавай месэлаяр гьялиз жеда, - къейдна Н. Ш. Абдулмуталибова.
Эхирдай Нариман Шамсудинович Абдулмуталибова ва адахъ галаз атанвай жавабдар работникри агьалийрин патай хьайи суалриз жавабар гана, вилик акъвазнавай месэлаяр гьялунин, кимивилер арадай акъудунин рекьерай меслятар къалурна.
Хазран Кьасумов, «Куьредин хабарар» газетдин экономикадин отделдин заведующий.
