Къазахстан Республикадин лайихлу тренер, спортдин мастер Абдулнасир Мегьамекеримов кьиле авай ва тежрибалу са шумуд тренерди кIвалахзавай Эминхуьруьн ДЮСШ-дихъ са шумуд хуьре филиалар ава, анра 200-далай виниз жаванри ва жегьилри азаддаказ къушахар кьунай вердишвилер къачузва.
Са шумуд касдикай республикадин кIвенкIвечивал патал тухвай акъажунрин, Къазахстандин Актау шегьерда са шумуд уьлкведин спортсменрин иштираквал аваз тухвай турнирдин гъалибчияр ва призерар хьанва. Гьавиляй тежриба къачуз Эминхуьруьз республикадин маса районрай жаван пагьливанар мукьвал-мукьвал атун дуьшуьшдин кIвалах туш. ИкI, мукьвара чи ДЮСШ-диз Дербент шегьердин спортшколадин жаван пагьливанар мугьман хьана. Санал тренировкаяр тухунихъ галаз сад хьиз, кьве спортшколадин спортсменри дуствилин гуьруьшни кьиле тухвана. Ана 12 х 3 гьисабдалди Эминхуьруьн команда гъалиб хьана. Мукьвал йикъара чи спортсменар Дербент шегьердизни фида.
Ихьтин гуьруьшри, са рахунни алачиз, жегьил спортсменриз тежриба къачунин, къуршахар кьунин рекьяй устадвал хкажунин карда куьмек гузва.