Райондин хуьруьн майишатдин карханайри, лежбервилинни фермервилин майишатри, арендаторри ва инвесторри, емишрихъ, салан майвайрихъ, техилдихъ, малдарвилин продуктрихъ галаз санал, эхиримжи йисара къарпузар, буранар ва суьрсетдин маса няметарни гьасилзава. Абурун арада нехуь кьетIен чка кьазва. Лагьана кIанда, бубайрин девиррилай гзаф менфятлу продукт яз гьисабзавай нехв битмишарзавай майишатар, кьилдин ксар Кьиблепатан Дагъустанда лап тIимил я.
Бубайрин ирс давамарун яз, чи районда нехв битмишарунал «ЧIахар» ООО машгъул жезва.
Нехуьн чIахар гьасилун - им, гьелбетда, хъсан, тебрик ийиз жедай кар я. Хъсан еридин продукция агьалийрал санитариядин къайдайрал амал авуналди, муьштерийрал агакьарун мадни важиблу я. И кар и продукт гьасилзавай инвесторди аннамишнава. Гьавиляй нехв чкадал регъвезва, ам пачкайра твазва. «Лезги чIахар» гафар кхьенвай пачкаяр гзаф туьквенрай маса гузва. ИкI, райондиз са шумудра Ставрополдин, Краснодардин, Астрахандин областрай, Калмыкия республикадай ва уьлкведин маса субъектрай агьалийрилай хтай чарарай аквазвайвал, дагъвийрин продукциядихъ яргъарани игьтияж ава, абуруни нехуьн чIахардин менфятлувал гьисснава.
- «ЧIахар» карханади гьар йисуз 110-120 гектарда нехв цазва, райондин шартIариз, авай мумкинвилериз килигайла, им тIимил туш, - лугьузва райондин хуьруьн майишатдин отделдин начальник Мегьамедзагьид Бабаева, - карханади нехуьн чIахардалди неинки район, санлай республика таъминарзава, и продуктдихъ агьалийрин патай игьтияжни ава. Хъсан шейиниз муьштерияр гзаф жеда эхир.
Са рахунни алачиз, нехв цуни, битмишаруни райондин тIвар яргъарани машгьурзава. Мадни, нехв неинки райондин, гьакI Дагъустандин брендрикай (яржарикай) сад я лугьуз жеда.
Инсан патал зиянлу са элементни квачир ерилу техил «ЧIахар» ООО-ди «Гележегдин сагълам хуьрек» лишандик кваз акъудзава.
Хазран Кьасумов.
