Чи бубайрин крар, кьегьалвилер къенин несилдиз чешне къачудай хъсан чешме я. Заз агъадихъ жуван бубадикай куьруь суьгьбет ийиз кIанзава.
Хазаров Алимирзе Хазарович 1907-йисуз чи райондин Агъа-Арагърин хуьре дидедиз хьана.
Сифтегьан чирвилер ада Кьасумхуьрел 7-классдал кьван к1елна чирвилер къачуна. Ахпа ам Бакудиз акъатна, нафтIадин мяденра нефтяник-бурильщик яз зегьмет чIугваз башламишна.
Гьа са вахтунда ада кIвалахдикай къерех тагьана рабфакдани кIелна. Жегьил нефтияникдин гьакъисагъ агалкьунриз килигна, ам 1930-йисуз КПСС-дин жергейризни кьабулна. А вахтунда «Бакинский рабочий» газетдиз тежрибалу нефтяникдикай «Жегьил коммунист-кIвенкIвечи» тIвар алаз макъалани акъатнай.
1934-1936-йисара, виринра хьиз, Кьасумхуьруьн райондани колхозар тешкилзавай.
1934-йисан эхирриз Бакудай хуьруьз отпускадиз хтай Алимирзедиз КПСС-дин райкомдин сад лагьай секретарь ивигарви Эмиров Нурдина вичин патав атун теклифна. Суьгьбетар кьиле фейидалай кьулухъ ада Хазароваз, районда акъвазна, лежбервилин коми-тетдин председателвал авун теклифна. Жегьил савадлу, тешкилатчивилин алакьунар авай, коммунистди районда колхозарар арадал гъунин, чилер паюнин кардик вичин лайихлу пай кутуна.
1936-йисуз Хазаров Алимирзе КьепIир-Къазмайрал «Ким» тIвар алаз цIийиз арадал атай колхоздин кьиле акъвазна. Майишат гуьнгуьна туна, колхозчийрин дуланажагъдин шартIар хъсанарна.
1942-йисуз колхоздин председателдиз Яру Армиядин жергейриз эвер гана. 1943-йисуз жегьил аскер ротадин политрук Кировский военно-технический училищедиз кIелиз рекье туна.
Училище куьтягьай офицер-лейтенант стрелковый взводдин командир яз 1-Украинский фронтдиз рекье туна.
Немсерихъ галаз кьиле фейи женгера Хазаров Алимирзе кьиле авай взводди душмандиз еке ягъунар кьуна, гъалибвилер къазанмишна, Украинадин шегьерар фашистрикай азадна.
Хазаров Алимирзеди фронтда къалурай кьегьалвилерин гьакъиндай адаз ганвай Ватандин дяведин 1-дережадин, Яру гъетрен орденри, хейлин медалри шагьидвалзава. Ам СССР-дин оборонадин министр Гречкодин къул алаз «За доблесть и отвагу в Великой Отечественной войне» знакдин сагьибни я. Гьайиф хьи, викIегь командир Берлиндив кьван агакьнач.
1944-йисан декабрдиз Украинадин Самбург шегьер немсерин чапхунчийрикай азад ийидай къати женгера адал залан хер хьана. Ам 2136-нумрадин госпиталдиз аватна, сагъ хъхьай офицер-командир, инвалид яз, дяве куьтягь жез 4 варз амаз, армиядикай къерех авуна, кIвализ рахкурна.
Инвалид я лагьана ам гьукуматда кьиле физвай вакъиайрикай къерех хьана акъвазнач. Ам ислягь зегьметдин фронтдик экечIна. Ада Белиж поселокда авай районрин уртах «Зоготзернодин», Самур участокда «Скотооткормочный» совхозрин директорвиле, «Рычал-су» заводдин директорвиле кIвалахна.
1953-йисуз СССР-дин хуьруьн майишатда дегишвилер твадай къарар кьабулна. И къарардин бинедаллаз Кьасумхуьруьн райондани (Ивигрин, Вини Арагърин, Агъа Арагърин) колхозар акадарна, центр Агъа-Арагъ яз, Чкалован тIварунихъ галай цIийи колхоз тешкилун Хазаров Алимирзедал тапшур-мишна.
Вичиз и рекьяй бес кьадар чирвилер хьуниз килигна, ада са куьруь вахтунда майишатар акадарна, чилер, мал-къара балансдал кьабулна, пешекарар, бригадирар хкяна, колхозди вичин кIвалах башламишна. Райкомдин бюродин къарардалди колхоздин председателвиле Хазаров Алимирзе тестикьарна.
Ада балкIандал алаз никIериз, фермайриз, гьакIни дагъдизни физ, кIвалахар физвай гьаларал гуьзчивал тухуз, меслятар къалуриз хьана. И карда адаз вичел дяведин девирда гьайи хирерини хабар гузвай.
Са шумуд йисуз кIвалах авурдалай кьулухъ ам вичин хушуналди пенсиядиз экъечIна. Пенсияда аваз эхиримжи са шумуд йисуз ада автостанциядин кассирвални авунай.
Хазаров Шагьлар, пенсионер.