Къе виридаз ашкара тирвал, ХХ асирдин эхирра ва ХХI асирдин эвел кьилера дуьньядин тарихда тахьай хьтин, политикадин, миллетдин, диндин террор пайда хьанва. Гзаф чкайра, гьабурукай яз Дагъларин уьлкведа, чи райондани ам виридалайни чIехи, кар алай месэладиз элкъвенва.
Гьайиф къведай ва рикIи кьабул тийидай гьакъикъат я: виликдай чи район республикада ва адалай яргъара арифдаррин, камал-эгьлийрин, шаиррин, зегьметкеш инсанрин макан яз машгьур тир. Гила лагьайтIа, райондин тIвар «чIулав» сиягьда гьатнава, гьа терроризм лугьудай завалдихъ галаз алакъалу яз, эхиримжи вахтара хьайи чIуру вакъиаяр себеб яз.
Лагьана кIанда, терроризмдин ва экстремизмдин вилик пад кьун патал районда кардик квай терроризмдиз акси комиссияди, къайдаяр хуьдай ва гуьзчивалдай органри, общественный теш-килатри тайин кIвалах тухузва, чкайрал гьар жуьредин мярекатар тешкилзава. ИкI, алатай йисан эхирра (декабрдин вацра) муниципальный райондин Кьил Нариман Шамсудинович Аб-дулмуталибован Распоряженидин бинедаллаз ва «2015-йисуз Дагъустан Республикада терро-ризмдин идеологиядиз акси акъвазунин комплексный план-дин» сергьятра аваз райондин образованидин идарайра «Школьникар террордиз акси я» лишандик кваз диде-бубайрин умуми собранияр, гьакIни школьникрин иштираквал аваз маса мярекатар кьиле тухвана. Анра администрациядин жавабдар работникри, АТК-дин членри, общественный тешкилатрин векилри иштиракна.
Алай йисан 15-январдиз муниципальный районда кардик квай терроризмдиз акси комиссиядин совещанидални и завалдин вилик пад кьунихъ галаз алакъалу месэлайриз килигна. Муниципальный райондин Кьил, терроризмдиз акси комиссиядин председатель Нариман Шамсу-динович Абдулмуталибова тухвай совещанидин кIвалахда админис-трациядин Кьилин заместителри, жавабдар работникри, къайдаяр хуьдай ва гуьзчивалдай органрин, общественный тешкилатрин руководителри, хуьрерин поселенийрин кьилери, АТК-дин членри, РОВД-дин участковый уполномоченныйри, теклифнавай маса юлдашри иштиракна.
Сифтедай Н. Ш. Абдул-муталибова районда авай общественно-политический гьалдикай, терроризмдиз акси комиссияди тухузвай кIвалахдикай куьрелди малумат гана, вилик акъвазнавай везифайрикай лагьана.
Совещанидал РФ-дин ФСБ-дин районрин уртах отделдин начальник Тарлан Тагьирова, МВД-дин райондин отделдин начальник Мавлудин Мегьа-медова терроризмдихъ ва экстремизмдихъ галаз алакъалу яз дуьньяда, гьабурукай яз республикада ва районда арадал атанвай гьаларикай, абурун вилик пад кьун патал тухузвай серенжемрикай, къайдаяр хуьдай ва гуьзчивалдай органрин, гьакI санлай обществодин вилик акъвазнавай везифайрикай гегьеншдиз суьгьбетна, тайин мисалар гъана, теклифар гана.
Совещанидал алай месэладай анал райондин агъсакъалрин Советдин председатель Фахрудин-гьажи Османова, дяведин ва зегьметдин, къайдаяр хуьдай органрин ветеранрин Советдин председатель Абдулаким Гьажимурадова, райондин администрациядин Кьилин 1-заместитель Лацис Оруджева ва маса ксари чпин фикирар лагьана, терроризмни экстремизм негьна, терроризмдихъ галаз женг чIугунин, агьалийрин хатасузвал, игьтият хуьнин рекьерай къиметлу меслятар къалурна, теклифар гана.
Совещанидал меслят хьайивал, районда кардик квай терро-ризмдиз акси комиссиядинни къайдаяр хуьдай ва гуьзчивалдай органрин руководителрин иштираквал аваз ихьтин совещанияр вацра са сеферда кьиле тухуда.
